Mýndıal-2014: Karım Benzema Frantsııa quramasyna alǵashqy jeńis ákeldi - VIDEO
ASTANA. QazAqparat - Búgin Frantsııa quramasy Brazılııada ótip jatqan fýtboldan álem chempıonatynda Gondýras komandasyn 3:0 esebimen tize búktirdi.
Birinshi taımda Frantsııa fýtbolshylaryna gol salý óte aýyr boldy. Gondýras quramasy barlyq ujymmen qorǵanysty bekem ustaýǵa tyrysty. Degenmen taım sońynda óz aıyp alańynda frantsýzdyq fýtbolshyny shalyp jyqqan gondýrastyqtarǵa bas qazy aıyp dobyn belgiledi. Ol dopty ataqty shabýylshy, "Real" klýbynyń fýtbolshysy Kárim Benzema minsiz oryndady.
Ekinshi taımda Benzema gondýrastyqtardyń qaqpasyna dop baǵyttaǵan bolatyn, sol kezde dop qaqpashydan serpilip, golǵa aınaldy. Onyń ózin qazylar Brazılııadaǵy mýndıalda tuńǵysh engizilgen goldy anyqtaýdyń jańa tehnologııasy negizinde bilgen bolatyn. Gol qaqpashy Valıadarestiń atyna, avtogol retinde jazyldy. Degenmen Benzema munymen toqtamaýǵa bekingen jáne onysyn matchtyń 72-mınýtynda ispen dáleldedi. Osylaısha, Benzema álem chempıonatynda dýbl jasaǵan tórtinshi fýtbolshy bolyp otyr. Bunyń aldynda brazılııalyq Neımar, gollandııalyq qos shabýylshy Van Persı men Robben enshilerine eki goldan jazǵanyn aıta ketý kerek.
