Mundaı ystyqta shańǵymen tuǵyrdan sekirýden Álem Kýbogyn ótkizgen emespiz - V. Hofer
ALMATY. QazAqparat - Shańǵy sporty tarıhynda mundaı joǵary temperatýrada shańǵymen tuǵyrdan sekirýden Álem Kýbogyn ótkizgen emespiz. Almatyda 2016 jyldyń 27-28-shi aqpany aralyǵynda shańǵymen tuǵyrdan sekirýden ótken Álem Kýbogynyń eki kúndik qysqy kezeńiniń jarystary aıaqtalǵan soń, «QazAqparat» tilshisine bergen suhbatynda Halyqaralyq shańǵy sporty federatsııasynyń (FIS) shańǵymen tuǵyrdan sekirý boıynsha jarystarynyń dırektory Valter Hofer osylaı dedi.
«Almatyda kún ystyq boldy. Mundaı joǵary temperatýrada shańǵymen tuǵyrdan sekirýden Álem Kýbogyn ótkizip kórgen emespiz. Árıne, Slovenııanyń Planıtsa qalasyndaǵy jarystar barysynda da keıde kún jyly bolady. 1995 jylǵy Álem chempıonaty barysynda da kún jyly bolǵan. Biraq, munshalyqty deńgeıde emes. Almatydaǵydaı jaǵdaı meniń esimde joq. Soǵan qaramastan, jarys óte joǵary deńgeıde ótkizildi. Uıymdastyrýshylar men eriktilerdiń jumysyna rızamyn», - dedi V. Hofer.
Ol sonymen qatar, qazir zamanaýı tehnologııalardyń arqasynda qysqy kezeńderdi jyly aýa-raıynda da ótkize berýge bolatyndyǵyn jetkizdi.
«Árıne, qazir jańa tehnologııalar shyǵyp jatyr. Solardyń arqasynda qardy jasaýǵa da muzdatýǵa bolady. Tipti sekirý ekpinin kúsheıtý úshin plastık te qoldanylady. Biraq, ár nárseniń shegi bolady ǵoı. Almatyda aýa temperatýrasy 17 gradýstan joǵary boldy. Bul men úshin rekord», - dep kúldi V. Hofer.
Aıta ketelik, bıyl búkil Eýropa elderinde aýa-raıy erekshe jyly bolǵany málim. Sondyqtan, shańǵymen tuǵyrdan sekirý boıynsha Álem Kýbogynyń kezeńderi kúrdeli jaǵdaıda ótti.
Biraq, Almatydaǵy kúnniń ystyqtyǵy barlyǵynan asyp tústi.
Jarystyń alǵashqy kúni - 27-shi aqpanda qalada aýa temperatýrasy 20 gradýsqa deıin jylyndy.
