«Mundaı nársemen ázildemeıdi»: prokýror Ádilet Zeıneldiń reaktsııasyn synǵa aldy
ASTANA. KAZINFORM — Uldana Myrzýannyń qazasyna qatysty sotta jábirlenýshi Ádilet Zeınel jubaıynyń aýrýhanaǵa túskeni týraly alǵashqy habardy qalaı estigenin aıtyp berdi. Ol áriptesiniń qońyraýyn bastapqyda nelikten ázil dep qabyldaǵanyn da túsindirdi.
— Siz áriptesterińiz alǵash ret qońyraý shalyp, jubaıyńyzǵa uqsaıtyn adam aýrýhanaǵa jetkizilgenin habarlaǵan. Sonda siz: «Telefondy qoıa saldym, óıtkeni bul ázil shyǵar dep oıladym» dedińiz. Aıtyńyzshy, mundaı nársemen ázildeýge bola ma? Onyń ústine jubaıyńyzdyń shaqyrtýǵa bara jatqanyn jáne bir jerde bir nárseniń qulaǵanyn aıtqanyn bildińiz, — dep suraq qoıdy prokýror Saıajan Serikova.
Óz jaýabynda Ádilet Zeınel neniń qulaǵanyn naqty aıtpaǵanyn túsindirdi.
— Árıne, mundaı nársemen ázildemeıdi. Biraq kimniń qońyraý shalǵanyn bilmedim, ol meniń dosym nemese tanysym emes edi. Sondyqtan habardy birden shynaıy qabyldamadym. Al shamamen bes mınýttan keıin, naqtyraq aıtsam, úsh mınýttan soń týǵan anam qońyraý shalǵanda, sol kezde ǵana áıelimniń shynymen qabyldaý bóliminde jatqanyn túsindim, — dep jaýap berdi jábirlenýshi.
Prokýror: Jaqsy, osy qońyraýdan keıin jubaıyńyzǵa ózińiz habarlasyp kórýge tyrystyńyz ba?
Á. Zeınel: Men birden tómen tústim. Baspaldaqpen túsip kele jatqanda qońyraý shalǵan joqpyn, óıtkeni uıaly telefonymdy bólimde qaldyrdym. Ýaqytym bolmady. Sol kezde otadan keıin quraldardy jınap jatqanmyn. Bárin tastap, birden tómen tústim.
Prokýror: Al anańyz sizge qaı kezde qońyraý shaldy?
Á. Zeınel: Quraldardy jınap jatqan kezde.
Prokýror: Biraq telefonyńyzdy bólimde qaldyrdyńyz ǵoı.
Á. Zeınel: Bólim degenim — quraldardy jınaıtyn bólme. Sol bólimde…
Prokýror: ıAǵnı, telefon ózińizben birge boldy ǵoı?
Á. Zeınel: Telefon quraldardy jınaıtyn bólmede ózimmen birge boldy. Biraq baspaldaqpen tómen túse bastaǵanda, ony sol jerde qaldyrdym.
Prokýror: Anańyz qońyraý shalǵansha jubaıyńyzǵa ózińiz habarlasýǵa tyryspadyńyz ba?
Á. Zeınel: Joq. Qabyldaý bólimine túskennen keıin qońyraý shalýǵa tyrystym. WhatsApp arqyly jazǵan sııaqtymyn nemese qońyraý shalǵan shyǵarmyn, naqty esimde joq. Biraq jaýap bolmady, telefondy kótermedi. Sodan keıin qabyldaý bóliminde jaqyn týysy bolǵanym úshin alǵashqy bes mınýtta meni ishke kirgizbedi. Sonda jedel járdemde jumys isteıtin dostaryma qońyraý shala bastadym. Uldanamen bir topta oqyǵanbyz. Sol jerde jumys isteıtin dostaryma qońyraý shala bastadym. Olar bolǵan jaǵdaıdyń bárin rastady.
Buǵan deıin Ádilet Zeınel áıelimen ótken sońǵy saǵattar týraly aıtyp bergen edi.
Sondaı-aq Á. Zeınel Astana ákimdiginen alǵan 20 mln teńgeni qaıda jumsaǵanyn túsindirdi.
