Muńaıtpasov atyndaǵy stadıon 4 maýsymda ashylady
ASTANA. KAZINFORM – Astanada Qajymuqan Muńaıtpasov atyndaǵy fýtbol stadıonynyń qurylysy tolyqtaı aıaqtaldy. Bul týraly qala ákimi Jeńis Qasymbek áleýmettik jelide jazdy.
Ańyzǵa aınalǵan bul stadıonnyń tarıhy 1936 jyldan bastaý alady jáne búgin ol qaıta jańǵyryp, zamanaýı kelbetke ıe boldy.
– Búgin QR Bas prokýrory Berik Asylovpen birge qurylys jumysy tolyq aıaqtalǵan nysandy aralap kórdik. Stadıon Arnaıy memlekettik qordyń qarajaty esebinen salyndy. Bas prokýratýra zańsyz jolmen ıemdenilgen aktıvterdi memleketke qaıtarý baǵytynda júıeli jumys júrgizip keledi. Sport nysanynyń jalpy aýdany 18 myń 951 sharshy metr. Stadıon UEFA-nyń 2-sanatyna saı keledi jáne 3 myń 600 kórermenge arnalǵan. Stadıon UEFA men Qazaqstan fýtbol federatsııasynyń standarttaryna saı keletin zamanaýı sport jabdyqtarymen jáne jasandy jabynmen qamtamasyz etilgen, - dep jazdy Jeńis Qasymbek.
Nysanda kórermenge arnalǵan trıbýnalar, konferents-zal, kıim aýystyratyn bólmeler, medıtsınalyq kabınetter, ákimshilik blok pen tehnıkalyq aımaqtar, sondaı-aq VIP-lojalar qarastyrylǵan.
– Jobany iske asyrý elordanyń sport ınfraqurylymyn damytýǵa jáne qalalyq ári respýblıkalyq deńgeıdegi jarystardy ótkizý úshin zamanaýı jaǵdaılar jasaýǵa baǵyttalǵan. Qazirgi ýaqytta nysandy paıdalanýǵa berý boıynsha zańdyq jáne uıymdastyrýshylyq rásimder júrgizilip jatyr. Aldaǵy ýaqytta stadıon Astana qalasy ákimdiginiń «№8 olımpıadalyq rezervtiń mamandandyrylǵan balalar-jasóspirimder sport mektebi» KMM teńgeriminde bolady, - dedi ákim.
Stadıonnyń tolyqtaı ashylýy 4 maýsymǵa josparlanyp otyr. Ol 2013 jyly týǵan jasóspirimder arasynda BJSM men ORMBJSM komandalary qatysatyn Qazaqstan Respýblıkasynyń jyl saıynǵy fýtbol chempıonaty aıasynda ótedi. Chempıonatqa elimizdiń túrli óńirlerinen mamandandyrylǵan balalar-jasóspirimder sport mektepteri, olımpıadalyq rezerv mektepteri men fýtbolshylar daıarlaý ortalyqtary atynan eń myqty 15 komanda qatysady.
Týrnır Qazaqstandaǵy balalar-jasóspirimder fýtboly júıesindegi mańyzdy respýblıkalyq jarystardyń biri bolyp sanalady jáne buqaralyq sportty damytýǵa, balalar men jasóspirimder arasynda fýtboldy nasıhattaýǵa, sondaı-aq jas sportshylardyń daıarlyq deńgeıin arttyrýǵa baǵyttalǵan.
Atyraý oblysynda 12 myń oryndyq stadıonnyń qurylysy bastalǵanyn jazǵan edik.
