Munaıshylar ardagerlerge qurmet kórsetti - Qyzylorda oblysy
QYZYLORDA. QazAqparat - «PetroQazaqstan» sport kesheninde «PetroQazaqstan Qumkól Resorsız» AQ-nyń qaıyrymdylyq aktsııasy bolyp ótti.
Dástúr boıynsha kóktemgi Naýryz meıramy qarsańynda munaıshylar kompanııa ardagerlerine, zeınetkerlerine, jumysta júrip jaraqat alǵan jáne asyraýshysynan aırylǵan eńbekkerler otbasylaryna azyq-túlik paketterin tabys etti.Bul týraly kompanııanyń baspasóz qyzmeti habarlady.
«PQQR» AQ óńirdiń áleýmettik salasynyń damýyna atsalysa otyryp, bıznestiń áleýmettik jaýapkershilik qaǵıdattaryn qatań ustanady. Kompanııa aımaqtaǵy az qamtylǵan otbasylaryn, múgedek balalar men jetimderdi, ardagerlerdi, zeınetkerlerdi qoldaýǵa baǵyttalǵan bastamalar men aktsııalardan, birlesken qaıyrymdylyq isterden turatyn is-sharalar keshenin júzege asyryp keledi. Munaıshylarǵa ataýly kúnderge arnap azyq-túlik paketterin taratý sharasy jylyna eki ret - Naýryz jáne Jańa jyl meıramdarynda uıymdastyrylady. Bıylǵy jyly 140-qa jýyq adamǵa berilgen azyq-túlik jıyntyǵyna - 25 keliden qant, kúrish, un, 10 keli makaron ónimderi, 2 keli shaı jáne 5 lıtr ósimdik maıy kiredi. - Naryqta munaıdyń baǵasy túskenine qaramastan, «PQQR» AQ óziniń izgi dástúrinen jańylmaq emes. Kompanııa oblystyń áleýmettik-ekonomıkalyq salasyn órkendetýge úles qosa otyryp, barlyq qaıyrymdylyq jáne demeýshilik sharalarǵa belsendi túrde qatysady», - deıdi «PQQR» AQ basqarma tóraǵasynyń eńbek resýrstary jáne ákimshilik jónindegi orynbasary Sýfııa Damınova.
«PetroQazaqstan» sport kesheniniń foıesinde kompanııa ardagerlerine shaı berý rásimi uıymdastyryldy. Aqsaqaldar ózderiniń qamqorshy áriptesterine jasaǵan kómekteri úshin alǵystaryn jaýdyrdy. Zeınetker Ermekbaı Shaımahanov «PQQR» AQ tarapynan beriletin kómekti ekinshi jyl qatarynan alyp otyr: - Biz sııaqty zeınetkerler úshin azyq-túlik paketteri úlken demeý, - dep aǵynan jarylady «PQQR» AQ ardagerler keńesiniń tóraǵasy Barlybaı Bımanov. - Barsha ardagerlerdiń atynan kompanııa basshylyǵyna osynshalyqty qamqorlyqtary úshin shynaıy rızashylyǵymdy bildiremin.
«PQQR» AQ jurtshylyqpen baılanys bóliminiń menedjeri Husaıyn Sársembaevtyń aıtýynsha, Ulystyń uly kúni- Naýryz merekesin toılaý aıasynda az qamtylǵan otbasylarynyń 350 balasyna qaıyrymdylyq erteńgilik uıymdastyrylmaq.
