Munaımen birge metaldardyń da baǵasy edáýir tómendep ketti - UEM
«Qazirgi kezeńde syrtqy ekonomıkalyq jaǵdaılar tómendegideı qalyptasyp otyr. Álemdik taýar naryqtarynda munaı men metaldardyń baǵasy edáýir tómendegeni baıqalady. 9 naýryzdaǵy jaǵdaı boıynsha munaı baǵasy bir barreline 34 dollardy qurady. Bul jyl basymen salystyrǵanda eki ese arzan. Kún ishinde munaı baǵasy bir barreline 31 dollarǵa deıin tómendegeni baıqaldy», - dedi Rýslan Dálenov Úkimet otyrysynda.
Onyń aıtýynsha, metaldardyń baǵasy da tómendegen. Atap aıtqanda myrysh baǵasy 16 paıyzǵa, mys 12 paıyzǵa, temir keni 4 paıyzǵa, ferroqorytpalar baǵasy 1,2 paıyzǵa túsken.
«Álemdik kapıtal naryǵy qubylyp tur. Jyl basynan beri amerıkalyq bırja ındeksteri 14 paıyzǵa, eýropalyq ındekster 15 paıyzǵa deıin jáne qytaı ındeksteri 13 paıyzǵa tómendedi. Bul úrdister syrtqy naryqtardaǵy joǵary belgisizdikti kórsetedi», - dedi ol.
Mınıstr qazirgi kezeńde Qazaqstannyń kredıttik reıtıngi naqtylanǵanyn atap ótti. Halyqaralyq reıtıngtik agenttikter Qazaqstannyń derbes kredıttik reıtıngin rastap, boljam «turaqty» deńgeıde saqtalǵan. Bul rette reıtıngti Standard and Poor's osy jylǵy 6 naýryzda, al Fitch Ratings 21 aqpanda aıqyndady.
«Syrtqy halyqaralyq sarapshylardyń pikirinshe, reıtıng boljamy eldegi makroekonomıkalyq turaqtylyq, ishki suranys rezervteri jáne munaılyq emes sektordyń ulǵaıýyna baılanysty bolady», - dedi ol.
