Munaılyda 5 mektep salynatyn boldy - Mańǵystaý oblysy
AQTAÝ. QazAqparat - Mańǵystaý oblysynyń ákimi Eraly Toǵjanov Munaıly aýdanyndaǵy jumys sapary barysynda «Schlumberger Logelco inc» munaı servıstik kompanııasynyń jumysymen tanysty, dep habarlaıdy óńir basshysynyń baspasóz qyzmeti.
Óndiristik baza aımaqtyń munaı óndirýshi kompanııalaryna munaı barlaý, burǵylaý, geofızıkalyq barlaý jumystaryn júrgizý qyzmetterin usynady. Búgingi tańda kompanııanyń jergilikti bóliminde 327 qyzmetker jumys isteıdi. Kompanııa qyzmetkerleri oblys ákimine mamandar daıarlaýda kezdesetin birneshe máselelerdi kóterdi. Osyǵan oraı Eraly Toǵjanov kásiptik mektepterdiń basshylarymen osy kompanııa negizinde biryńǵaı kásiptik ýchılışesin qurý týraly usynys engizýdi tapsyrdy.
Sondaı-aq, Eraly Toǵjanov Qyzyltóbe aýylyndaǵy 75 oryndyq «Myń ǵasyr» jekemenshik balabaqshasynyń jumysymen tanysty. Atalmysh balabaqshanyń ashylǵanyna 2 aı. Búginde19 adamdy jumyspen qamtyp otyr. Oblys ákimi jańa áleýmettik mańyzy bar nysannyń ashylýymen quttyqtap, aldaǵy ýaqytta onyń aýlasynyń aýmaǵyn keńeıtý qajet ekenin aıtty.
Aımaq basshysynyń jumys sapary №6 orta mektebinde jalǵasty. Atalmysh bilim oshaǵynda 3 210 oqýshy men 321 qyzmetker bar. Mektep úsh aýysym boıynsha bilim beredi. Eraly Toǵjanov bul máseleniń ońtaıly joldaryn qarastyryp, túpkilikti sheshýdi tapsyrdy. Munaıly aýdanynyń ákimi Nurlan Tájibaev óńir basshysynyń hattamalyq tapsyrmasy boıynsha Basqudyq aýylyndaǵy 600 oryndyq mekteptiń qurylysy aıaqtalyp, aǵymdaǵy jyly paıdalanylýǵa beriletindigin aıtty. Sondaı-aq, bıyl taǵy 5 mekteptiń qurylysy bastalmaq. Sol arqyly aýdandaǵy úsh aýysymdy oqytý júıesin retteýdi kózdeıdi.Sol arqyly aýdandaǵy úsh aýysymdy oqytý júıesin retteýdi kózdeıdi.
Kezdesý sońynda oblys ákimi mekteptegi jas sportshylarmen kezdesip, olardyń jetistikterine kýá boldy.
Sondaı-aq, Eraly Toǵjanov «Emır oıl» jáne «Shuǵyla» JShS munaı jáne janar-jaǵarmaı saqtaý bazasynyń jumysyn kórdi. Bul - munaı ónimderin alýǵa, saqtaýǵa jáne taratýǵa arnalǵan rezervýarlyq fermasy jáne ǵımarattar, qurylystar men baılanys kesheni bar kásiporyn. QazTransGazǵa 150 myń tonna ilespe gaz satady. Aqsaz aımaǵynda zaýyttyń qurylysy aıaqtalǵannan keıin shamamen kúndelikti 600 m3 óńdelgen gaz alý múmkin bolmaq. Bul óńirdegi gaz tapshylyǵy máselesin sheshýge kómektesedi. Oblys ákimi bul jóninde tolyq zerttep, esep berýdi tapsyrdy.
Sonymen qatar aımaq basshysy Baıandy aýylynyń mańyndaǵy qatty turmystyq qaldyqtardy qabyldaý polıgonyna bardy. Zańdy tulǵalar úshin qaldyqtardy qabyldaý quny 1 tekshe metrge - 559 teńge, jeke tulǵalar úshin 194 teńge. Eraly Toǵjanov polıgonnyń qaldyqtardy jınaý jumystaryna daıyndyǵy, qoqys óńdeý boıynsha ınvestorlardy tartý týraly esep daıyndaýdy tapsyrdy.
Jumys saparynyń sońynda Eraly Toǵjanov Munaıly aýdanynyń aktıvterimen jáne aqsaqaldarymen kezdesti. Onda shaǵyn jáne orta bıznestiń damýy, Qyzyltóbe aýylyn sýmen qamtamasyz etý, jol jáne taǵy basqa birqatar máseleler kóterildi.
