Munaıly meken kósheleri jedel basqarý ortalyǵynan qadaǵalanady
ASTANA. QazAqparat - 23 maýsym - Qazaqstan polıtsııasy kúni qarsańynda Atyraý oblysy, Jylyoı aýdanynyń ortalyǵynda jedel basqarý ortalyǵy paıdalanýǵa berildi, dep habarlaıdy QazAqparat tilshisi.
QR ІІM baspasóz qyzmetiniń məlimetinshe, Qulsary qalasynda boı kótergen nysanda bir ýaqytta 500 kameradan kóshe qozǵalysyn baqylaýǵa bolady.
Saltanatty sharaǵa Atyraý oblystyq ІІD bastyǵy polıtsııa polkovnıgi Aıan Dúısembaev qatysty. Sharada quttyqtaý sóz sóılegen aýdan ákimi Álımuhammed Quttymuratuly jańa nysannyń qoǵamdyq qaýipsizdikti qamtamasyz etýdegi mańyzdylyǵyna toqtalyp, materıaldyq jabdyqtaý jalǵasatynyn aıtty. Beınekameralarmen jabdyqtaý jumystarynyń alǵashqy satysynda 250 beınebaqylaý kamerasy ornatylady.
Lenta qııý saltanatynan keıin sala ardagerleri bastap záýlim ǵımaratty aralady. Tómengi qabatta ornalasqan atý tırinen bastap «102» operatorlarynyń jumys orny, qarý-jaraq saqtaý qoımasy, muraǵat bólmesi, beınebaılanys múmkindigi bar májilis zalymen tanysqan meımandar polıtsııa qyzmetkerleriniń jumysyna sáttilik tiledi.
Oblysta balamasy joq lazerli-mýltımedııalyq jyljymaly nysandary bar atý tıriniń múmkindikterine toqtalǵan Aıan Dúısembaev óńir basshysynyń qoldaýymen boı kótergen jańa nysan shaǵyn qalalardy damytý josparyna saı salynǵanyn jetkizdi.
«Polıtseılerdiń jaýyngerlik biliktilikterin shyńdaýmen qatar munda qyzmet atqaratyn 12 ınspektorǵa aýdandaǵy turaqtylyq pen qylmystyń aldyn alýdy uıymdastyrýǵa barlyq múmkindik jasalǵan» dep sózin qorytyndylady oblystyń bas polıtseıi.
Departament bastyǵynyń sózin tergeý salasynyń ardageri Tappatııa Bekenov quptady.
«Buryn 3 bólimge ortaq 1 jazý mashınkasyn paıdalanatyndyqtan, kúdiktiler toptap quryqtalǵanda qaǵazdardy basyp shyǵarý úshin kezekke turatynbyz. Mashınkada sııa men qaǵaz bitpesin dep tileıtinbiz. Óıtkeni, ortalyqqa baratyn kólik kóp artyla bermeıtin. Búgingi kúnge, jastar úshin qýanyp otyrmyn»,- deıdi zeınettegi podpolkovnık.
Jalpy aýmaǵy 2500 sharshy metr ǵımarat derbes jylý qazandyǵy men generator sondaı-aq, órt qaýipsizdigi úshin asa mańyzdy syıymdylyǵy 50 tonnalyq sý saqtaıtyn qutymen de qamtylǵan.
