Munaıly aımaqtyń joǵary kásibı ınjener mamandary daıarlanatyn ınstıtýtta 54 túlek «erekshe» dıplom aldy

ATYRAÝ. QazAqparat - Atyraý munaı jáne gaz ınstıtýtyn bitirýshi túlekterdiń dıplom alý saltanaty ótti. Instıtýt - elimizdiń munaı-gaz salasynyń kemeldenip damýyna úles qosyp otyrǵan irgeli bilim oshaǵy. Bıylǵy jyly 800-ge jýyq bitirýshi túlek oqý ornyn támamdasa, olardyń ishinde 54-i - erekshe dıplom ıegeri, dep habarlady «Atyraý» gazeti.

Munaıly aımaqtyń joǵary kásibı ınjener mamandary osy ınstıtýtta daıarlanyp shyǵady. Túlekterdiń aldy kásiptik bilimderin tabysty iske asyryp, memlekettik qurylymdarda, elimizdiń iri kompanııalarynda eńbek etýde, bilim jáne ǵylym salalaryn damytýǵa aıtarlyqtaı úles qosýda, - dedi ınstıtýt rektory Álı Ábishev.

  Aıta keteıik, ótken oqý jylynda ınstıtýt «Embimunaıgaz» AQ-men birlesip, dýaldyq bilim berý júıesin júzege asyrdy. Nátıjesinde, «Polıgon» atalǵan bilim berý tájirıbesi negizinde «Munaı gaz isi» mamandyǵynyń on bes bitirýshi túlegi bilim ala júrip, Qulsary ken orynynda jumys jasady. Stýdentke ınstıtýt qabyrǵasynda eńbek kitapshasyn ashýyna jaǵdaı jasap, qamqorlyq kórsetken bilim ordasynyń «Qamqorshylyq keńesiniń» tóraǵasy, tehnıka ǵylymdarynyń doktory, «KAZENERGY» qaýymdastyǵy tóraǵasynyń orynbasary Uzaqbaı Qarabalın edi. Saltanatty sharada Uzaqbaı Súleımenuly on bes túlekke dıplommen qosa eńbek kitapshasyn tabystady. Óndiris pen bilimdi qatar qoıǵan tájirıbe elimiz boıynsha atalmysh ınstıtýtta ǵana engizilgen. Tájirıbe kelesi jyly da jalǵasyn tappaq. Aldaǵy ýaqytta oqý orny tórt iri munaı kásipornymen birlesip jumys jasaýdy kózdep otyr.

  Sondaı-aq, saltanatty rásimde «Merıdıan Petroleým» kompanııasynyń prezıdenti, «Qazaqstannyń munaıshy-geologtar» qoǵamynyń basshysy, geologııa jáne mınerologııa ǵylymdarynyń doktory Baltabek Qýandyqov, «Kaspıı turba qubyrlary konsortsıýmy-Qazaqstan» (KTK-Q) AQ-nyń aımaqtyq menedjeri Sársembaı Murynov, «Ekologııa jáne ómirdegi tirshilik qaýipsizdigi» halyqaralyq akademııasynyń akademıgi, ekonomıka ǵylymdarynyń doktory Maǵaýııa Shyrdabaev, Atyraý qalalyq máslıhatynyń hatshysy Qanat Ázmuhanov túlekterge jyly lebizderin bildirip, sát-sapar tiledi. Bitirýshi túlekter atynan stýdenttik pándik olımpıada júldegeri Altynaı Qadyrǵalıeva, «Qazaqstan stýdentter Alıansy» jáne stýdenttik eriktiler qozǵalysynyń kóshbasshysy Baýyrjan Qaraǵulov quttyqtaý sóz sóıledi. «Ǵıbrat-Lıder» debat klýbynyń belsendi músheleri jáne stýdenttik eriktiler qozǵalysynyń kóshbasshysy Asqar Esengeldın men Evgenııa Isaevskaıa, «Halyqaralyq munaıshy-ınjenerler» qoǵamynyń jastar toby boıynsha jetekshisi Dına Meıirmanova egemen elimizdiń gúldenýine óz úlesterin qosýǵa aıanbaı ter tógetinderin aıtty.