Munaıǵa eksporttyq kedendik baj salyǵynyń deńgeıi mamyrda qarastyrylýy múmkin - D. Erǵojın

ASTANA. QazAqparat - Qazaqstanda munaıǵa eksporttyq kedendik baj salyǵynyń deńgeıi mamyrda qarastyrylýy yqtımal. Bul týraly búgin Astanada salyqtyq jáne kedendik ákimshileýdi jetildirýge arnalǵan «dóńgelek ústelde» QR Qarjy mınıstrliginiń memlekettik kirister boıynsha komıtetiniń tóraǵasy Dáýlet Erǵojın málim etti.

«Shynymen de qazirgi kezde munaı baǵasy qubylmaly, ıaǵnı apta saıyn ózgerýde. Birde tómendese, birde kóterilip jatyr. Sondyqtan da birjaqty sheshim jasap, qazir stavkany nóldeý týraly aıtý erterek. Osy oraıda birinshi toqsannyń qorytyndysy boıynsha aldaǵy birneshe aıda ary qaraı jyljýdyń baǵdaryn zerdeleý kerek»,-dedi komıtet basshysy.

Onyń aıtýynsha, túzetýler jazǵa qaraı oryn alýy múmkin, ıaǵnı bul turǵyda jyldyń sońyna deıin boljam jasaýǵa bolady.

«Osy oraıda shamamen mamyrda boljam jasap, stavkalardyń mólsheri týraly sóz qozǵaýǵa bolady. Al qazirgi kezde (munaıǵa eksporttyq kedendik baj salyǵyn tómendetý) erterek, sebebi qysqy kezeńde munaıdy tutyný suranysy jaqsy deńgeıde. Jazǵy paıdalaný deńgeıi negizinen tómendeıdi. Sondyqtan da túzetýlerdi mamyrda qarastyrýymyz yqtımal»,-dedi Erǵojın.

Esterińizge sala keteıik, jaqynda Qazaqstanda munaıdyń bir tonnasyna eksporttyq baj salyǵy 80 dollardan 60 dollarǵa tómendetildi.