Munaıdyń qory máńgilik emes - Berdibek Saparbaev
Aqtóbe oblysynyń ákimi Berdibek Saparbaev shalǵaı aýyldardy aralap, halyqpen kezdesý jumystaryn jalǵastyryp jatyr. Bul joly óńir basshysy Baıǵanın aýdanyna baryp, birneshe aýyldy aralady.
Sonymen birge, ákim Qyzylbulaq aýyldyq okrýgi mańyndaǵy gaz óńdeý zaýytynyń qurylysymen tanysty. Jobanyń quny - 21 mıllıard teńge. Óndiris orny bıyl iske qosylady. Bul ilespe gazdy óńdep, ekologııany jaqsartýǵa arnalǵan joba. Aýyl halqy óńir basshysy Berdibek Saparbaevtan gaz máselesin surady. Buǵan deıin ot jaǵyp, kúl shyǵaryp júrgen aýyl turǵyndary Jańajol gaz óńdeý zaýytynyń ıgiligin kóredi. Qazirgi kezde Jańatań, Bulaqtykól jáne Kemershi aýyldaryna gaz tartý úshin daıyndyq jumystary júrip jatyr. Qubyr tartý bıyl bastalyp, 2019 jyly aıaqtalady.
«Memlekettiń qoldaýynyń arqasynda aýyldyq jerlerde kóptegen máseleler sheshilýde. Salynyp jatqan zaýyt jeltoqsan aıynda ol paıdalanýǵa beriledi. Aldaǵy ýaqytta qosymsha 220 mıllıon tekshe metr gaz alatyn bolamyz. Qazir zaýytta 220 adam jumys isteıdi, olardyń 50-i Baıǵanın aýdanynyń turǵyndary. Qoldanysqa berilgen kezde shamamen 600 jumys orny ashylady. 250-den astam adam turaqty jumys ornymen qamtamasyz etiledi. Eń jaqyn aýyldardyń jastary jańa óndiriske qajetti mamandyqtardy meńgerýi tıis. Prezıdent tapsyrmasynyń arqasynda olar tegin kásibı jáne tehnıkalyq bilim alady. Oqýǵa baratyn bolsa, olar talap etiletin mamandyq ıelerine aınalady, oqý kezinde shákirtaqy tólenedi. Jastar mal sharýashylyǵymen aınalysýy kerek. Munda olar memleket tarapynan qoldaý tabady. Munaıdyń qory máńgilik emes, oǵan senip otyrýǵa bolmaıdy»,- dedi óńir basshysy Berdibek Saparbaev.
Al 42 jyl aýyl mektebinde fızıka pániniń muǵalimi bolyp jumys istegen Myrzash Nurjanov aýyl turǵyndarynyń atynan taǵy da birneshe ózekti máseleni kóterdi.
«Men osy jerde týyp-ósip, ómir boıy osynda turdym. Aýyldyń búkil tarıhynda Siz osy jerge kelgen oblystyń birinshi ákimi boldyńyz. Sondyqtan birneshe máseleni aıtaıyn. Aýyldyń irgesindegi qaldyq tógetin polıgondy joıýdy suraımyn. Jeldi kúnderi jaǵymsyz ıis búkil aýyldy qamtıdy. Elektr jelileri jóndeý jumystaryn talap etedi. Jel kúni symdar jıi úzilip, biz elektr jaryǵynsyz qalamyz», - dedi Myrzash Nurjanov.
Óńir basshysy aldaǵy ýaqytta eki másele de muqııat zerdelenetinin jetkizdi.
