Munaıdyń álemdik baǵasy 120 dollardan asty

NUR-SULTAN. QazAqparat - Brent markaly munaıdyń álemdik baǵasy naýryz aıynyń sońynan beri alǵash ret barreline 120 dollardan (94,90 fýnt sterlıngten) joǵary ósti, dep habarlaıdy QazAqparat Guardian News basylymyna silteme jasap.

Sarapshylardyń baǵalaýynsha, baǵa ósimine Shanhaı men Beıjińdegi Covid-19 shekteýleriniń jeńildetilýi yqpal etti, bul óz kezeginde Qytaı tarapynan munaıǵa degen suranysty arttyra alady.

Buǵan qosa, EO-nyń reseılik kómirsýtekter ımportyna tyıym salýy da energııa tasymaldaýshylar baǵasynyń ósýine ákeledi. Ulybrıtanııada benzınniń ortasha baǵasy lıtrine 172,7 penske deıin, al dızel otynynyń ortasha baǵasy lıtrine 182,7 penske deıin kóterilip, jyl basynan beri ortasha eseppen 26%-ǵa ósken. Janarmaı baǵasynyń turaqty ósimi jańa áleýmettik tólemderdi qarjylandyrý úshin Ulybrıtanııa úkimetinen ústeme paıdaǵa qosymsha aqy alyp otyrǵan munaı kompanııalaryna paıda ákelýde.