Munaıdy kóleńkeli jolmen saýdaǵa salý áreketteri ótken jylǵydan 88 paıyzǵa kóp bolyp otyr - qarjy polıtsııasy
ASTANA. Qazannyń 28-i. QazAqparat /Aıdar Ospanalıev/ - Aǵymdaǵy jyldyń 9 aıynda qarjy polıtsııasy organdary munaı ónimderin kóleńkeli jolmen saýdaǵa salý áreketteri boıynsha 167 qylmystyq is qozǵaǵan.
Bul ótken jyldyń sáıkes merzimindegi kórsetkishten 88 paıyzǵa kóp bolyp otyr. Bul týraly búgin Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı jýrnalıstermen bolǵan aptalyq brıfıngte málim etti, dep habarlaıdy QazAqparat.
Onyń derekterine qaraǵanda, qozǵalǵan isterdiń 95-i sot organdaryna joldanǵan. Al janar-jaǵarmaıdy zańsyz saýdaǵa salýdan túsken kiris 72 mıllıard 22 mıllıon teńge bolǵan. «Tergeý amaldary mundaı qylmystardyń kóbine munaı ónimderin saýdalaý men saqtaý jumystarymen aınalysatyn kásipkerlik salasynda kóp bolatyndyǵyn anyqtady. Mysaly, Ońtústik Qazaqstan oblysynda M.Zýfarov atty jeke kásipker 2 jylǵa bas bostandyǵynan aıyryldy.
Ol «Nábı ata» janarmaı quıý stansysynda lıtsenzııasyz janarmaı saqtaýmen jáne ony satýmen aınalysqan. Zańsyz áreketten túsken qarjy 24,5 mıllıon teńgeni qurady», dedi resmı ókil.
Onyń málimetteri boıynsha, ońtústik óńirde osy tektes qylmys jasap, 60 mıllıon 900 myń teńge paıda tapqan A.Kamalov atty kásipkerge iri kólemde aıyppul salynǵan.
