Munaıdan basqa saladan da jumys qaraý kerek: Nurlan Noǵaev Jańaózen turǵyndarymen kezdesti
Aımaq basshysy Nurlan Noǵaev Jańaózen qalasynyń turǵyndarymen kezdesti, dep habarlaıdy Kazinform Mańǵystaý oblysy ákimdigine silteme jasap.
Qalada 262 kópqabatty úı bar, onyń 232-si 1960-1980 jyldary salynǵan. Ekeýi apatty kúıde, 52-sine kúrdeli jóndeý kerek.
Taǵy bir másele – sý tapshylyǵy. Ony sheshý úshin 2025 jylǵa deıin qýaty táýligine 50 myń m3 teńiz sýyn tuşytý zaýyty iske qosylmaq.
Alty saǵattyq kezdesýde turǵyndar túrli suraq qoıdy. Úı alýǵa járdemdesý, munaı-gaz salasyna jumysqa turǵyzý jóninde ótinish jasaǵandar boldy.
«Munaı-gaz salasyna jumysqa ornalasýǵa kelsek, kelisilgen algorıtmniń talaptaryn saqtamaı, kezeksiz uıymdastyrýdyń múmkin emestigi týraly birneshe ret aıttym. Biz árqashan ashyq dıalog qurýǵa daıynbyz. Alaıda osy tusta atap ótkim keletini – tek munaı ónerkásibinde ǵana emes, basqa salalarda da jumys isteý múmkinshiligin qaraý kerek. Mysaly, dáriger tapshylyǵy bar, osy máseleni sheshý úshin memleket kóp grant bólip, tegin bilim beredi. Bıznespen aınalysamyn deıtinderge memlekettik qoldaý kórsetiledi. Bolashaqta jasyl energetıka, aýyl sharýashylyǵyn damytý jáne basqa da jańa salalarda múmkindikter óte kóp», - dedi N. Noǵaev.
