Munaı jáne gaz salasyndaǵy jergilikti qamtý úlesin ulǵaıtýǵa qatysty eki bastama bar

NUR-SULTAN. QazAqparat – Munaı-gaz salasyndaǵy jergilikti qamtý úlesin ulǵaıtýǵa múmkindik beretin eki bastama júzege asyrylyp jatyr. Bul týraly QR Energetıka mınıstrliginiń alqa májilisinde vedomstvo basshysy Nurlan Noǵaev aıtty, dep habarlaıdy QazAqparat tilshisi.

«2020 jyldyń qorytyndysy aıasynda kómirsýtek shıkizaty jáne ýran óndirý boıynsha jer qoınaýyn paıdalanýshylardyń taýarlaryn, jumystary men kórsetiletin qyzmetterin (TJKQ) satyp alýdyń jalpy kólemi shamamen 5,4 trln teńge boldy. Sonymen qatar, otandyq qamtý atalǵan satyp alýda 46 paıyzdy qurady. Pandemııa kezinde jergilikti kásipkerlerdi memlekettik qoldaý aıasynda jer qoınaýyn paıdalanýshylardyń jáne olardyń merdigerleriniń kómirsýtekterdi barlaý nemese óndirý ári ýran óndirý jónindegi operatsııalardy júrgizý kezinde paıdalanylatyn taýarlardy, jumystardy jáne kórsetiletin qyzmetterdi satyp alý qaǵıdalaryna ózgerister engizildi. Bul ózgerister jer qoınaýyn paıdalanýshylarǵa qazaqstandyq taýarlardy konkýrstyq rásimderdi ótkizbesten, bir kózden satyp alýǵa múmkindik berdi», - dedi mınıstr.

Onyń aıtýynsha, qazirgi ýaqytta Mınıstrlik munaı-gaz salasyndaǵy jergilikti qamtý úlesin ulǵaıtýǵa múmkindik beretin eki bastamany júzege asyryp otyr:

birinshisi – Jergilikti qamtýdy damytýdyń tikeleı ınvestıtsııalar qoryn qurý, sonyń ishinde otandyq IT ázirlemelerin ilgerletý;

ekinshisi - Halyqaralyq munaı-gaz mashınasyn jasaýdy damytý jónindegi ortalyq qurý.

«10 jyl ishinde elimizdiń jalpy ishki ónimine Qor qyzmetiniń oń áseri shamamen 642 mln AQSh dollaryn quraıtyn bolady, al Halyqaralyq ortalyq 3 iri Operatordyń (NKOK, KPO jáne TShO) qajettiligi úshin servıstik kompanııalardyń/ jergilikti óndirýshilerdiń taýarlar men kórsetiletin qyzmetterdi óndirý men jetkizýde kemshilikterin joıýǵa múmkindik beredi», - dedi N. Noǵaev.