Munaı jáne gaz mınıstrligi egin oraǵyna arnalǵan dızel otynyn jóneltýdi jyldamdatýy qajet - AShM
ASTANA. Tamyzdyń 16-sy. QazAqparat /Rýslan Ǵabbasov/ - Munaı jáne gaz mınıstrligi egin oraǵyna arnaıy belgilengen dızel otynyn jóneltýdi jyldamdatýy qajet. Bul týraly búgin Úkimette ótken keńeste Aýyl sharýashylyǵy mınıstrliginiń jaýapty hatshysy Evgenıı Aman málim etti.
Onyń aıtýynsha, búginde egin oraǵy naýqanyn ótkizýge aýyl sharýashylyǵy taýarlaryn óndirýshilerdi 408 myń tonna dızel otynymen qamtamasyz etý máselesi sheshildi. Atalǵan dızel otyny jeńildikti baǵamen satylady, ıaǵnı lıtrine 62 teńgeden aspaıdy. «Qazirgi kezde kelisimderdi bekitý men qarjysy tólengen dızel otynyn jóneltý jumystary júrip jatyr»,- dedi jaýapty hatshy.
«Búginde barsha qajettilik deńgeıinen aýyl sharýashylyǵy taýarlary óndirýshileriniń dızel otynymen qamtamasyz etilýi kólemi 47 paıyzdy quraıdy. Burynǵy merzimge qaraǵanda bıylǵy jyly egin oraǵy erte bastalǵanyn eskere otyryp, Munaı jáne gaz mınıstrligi belgilengen dızel otynyn jóneltýdi jyldamdatyp, oblystarǵa qyrkúıektegi janarmaı kólemin tamyzda alýǵa múmkindik berýi qajet», - dedi E. Aman.
