Munaı urlyǵymen aınalysqan kúdiktiniń 13 jyldan bergi qylmysy ashylyp jatyr
Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Erkin Іzbasar bastaǵan qylmystyq topqa qatysty aldyn ala tyńdaý ótti . Qazirgi ýaqytta sottalýshy Erkin Іzbasar men onyń kómekshisi Qalıevti úsh advokat qorǵap jatyr.
Qorǵaýshylar Aqtóbe, Almaty oblystarynan tańdalǵan. Sonymen qatar, sot otyrysy kezinde Erkin Іzbasardyń anasy Meıramhan Іzbasar da balasyn qorǵaıdy.
«Men sotta ulym Erkin Іzbasardyń quqyǵyn qorǵaımyn. Ol 1997 jyly jol apatyna túsip, І top múgedegi bolyp qaldy. Múgedek arbaǵa tańylǵan. Ótken jyly qamaýǵa alynyp, densaýlyǵy nasharlap ketti. Qazir Temirjol aýrýhanasynda jatyr. Ustalǵannan beri jaryq kórgen joq, jýynbady. Bul jerde Erkin Іzbasardyń quqyǵy qorǵalmaı otyr», - dedi Meıramhan Іzbasar.
Búgingi aldyn ala tyńdaý kezinde protsessýaldy prokýrorlar aıyptaý qorytyndysyn jartylaı oqydy. Іs materıalyna súıensek, sottalýshy Erkin Іzbasar 2003 jyldan bastap qylmystyq top quryp, ony basqarǵan. Almaty, Aqtóbe qalasynda júrip birneshe kásipkerdi bopsalap, qorqytqan. Qarý ustady, saqtady, qoldandy degen de aıyp taǵylyp otyr.
«Aǵaıyndy tórteý» qylmystyq tobynyń serkesi Erkin Іzbasar óz sybaılastarymen birge jábirlenýshi Elekeevten kásipkerdi qylmys áleminde qorǵaý úshin 60 myń dollar suraǵan. Olar aqsha bermese, quqyq qorǵaýshylarǵa shaǵymdansa otbasyna, ózine qaýip tónetinin aıtyp, bopsalaǵan», - dedi prokýror Shoqparov.
Sottalýshylarǵa Qylmystyq kodekstiń «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý, «Urlyq», «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý», «Munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý» baptary boıynsha aıyp taǵyldy. Jábirlenýshiler arasynda kásipkerler men iri munaı kompanııalary bar. Sonymen qatar, Investıtsııalar jáne damý mınıstrliginiń Geologııa jáne jer qoınaýyn paıdalaný komıtetiniń ókili jábirlenýshi bolyp sotqa qatysyp jatyr.
Aıta keteıik, qylmystyq is 252 tomnan turady. Barlyǵy 26 sottalýshy men 8 jábirlenýshi bar. Olardy 30-ǵa jýyq advokat qorǵap jatyr. Sottalýshylardyń 8-i eshqaıda shyqpaý týraly qolhatpen bostandyqta júr.
