Munaı tógilýine baılanysty BAÁ-de jaǵajaılar jabyldy
ASTANA. KAZINFORM — Birikken Arab Ámirlikterinde el jaǵalaýynda tankerden munaı tógilýine baılanysty Ýmm-ál-Kýveın men Shardja ámirlikterindegi jaǵajaılar ýaqytsha jabyldy, dep habarlaıdy Reuters.
BAÁ-niń Klımattyń ózgerýi jáne qorshaǵan ortany qorǵaý mınıstrliginiń málimetinshe, mamandar munaımen lastanǵan aýmaqty oqshaýlaý jáne onyń qorshaǵan ortaǵa áserin baǵalaý jumystaryn bastady.
Bılik tekserý aıaqtalyp, qajetti qaýipsizdik sharalary anyqtalǵanǵa deıin Ýmm-ál-Kýveınniń barlyq jaǵajaıy men jaǵalaý aımaqtaryn ýaqytsha jabý týraly sheshim qabyldady. Kórshiles Shardja ámirliginde saqtyq sharasy retinde Ál-Hamrııa jaǵajaıy jabyldy.
Balyqshylar men teńiz aıdynyn paıdalanatyn basqa da azamattarǵa lastanǵan aýmaqtarǵa jaqyndamaý jáne tıisti organdardyń nusqaýlaryn oryndaý eskertildi.
Reuters agenttiginiń málimetinshe, BAÁ bıligi ázirge munaı tógilgen tankerdiń ataýyn jarııalamady jáne oqıǵanyń sebepterin naqtylaǵan joq.
Sonymen qatar Orbital Risk Intelligence taldaý kompanııasynyń basshysy Martın Kellı agenttikke bergen suhbatynda lastaný kózi 9 qazanda BAÁ jaǵalaýynda belgisiz snarıadtyń soqqysyna ushyraǵan Gem No.2 tankeri bolýy múmkin ekenin aıtty. Sol kezde kemede órt shyǵyp, keıin sóndirilgen.
19 jáne 21 qazanda túsirilgen spýtnıktik sýretterdi taldaý nátıjesinde munaı daǵynyń aýmaǵy shamamen 160 sharshy shaqyrymǵa jetýi múmkin ekeni anyqtaldy.
Sarapshylar munaımen lastaný jaǵalaýdaǵy ekojúıeler men ınfraqurylymǵa, sonyń ishinde porttar men halyqty aýyzsýmen qamtamasyz etetin tuşylandyrý qondyrǵylaryna qaýip tóndiretinin eskertedi.
Shardja, Adjman jáne Ýmm-ál-Kýveın turǵyndary da ótkir ıistiń taralǵanyna shaǵymdandy. Alaıda Klımattyń ózgerýi jáne qorshaǵan ortany qorǵaý mınıstrligi bul ıistiń halyq densaýlyǵyna qaýip tóndirmeıtinin málimdedi.
Buǵan deıin Abý-Dabıdiń ulttyq munaı kompanııasyna (ADNOC) tıesili eki kemege Ormýz buǵazy arqyly ótý kezinde shabýyl jasalǵany habarlanǵan bolatyn. Oqıǵa saldarynan eshkim zardap shekken joq. BAÁ Syrtqy ister mınıstrligi shabýylǵa Irandy jaýapty dep aıyptady.
