Munaı tasymaldaýǵa qatysty naqty málimetterge túsinikteme berilmeıdi – Teńizshevroıl
ATYRAÝ. KAZINFORM – «Teńiz» ken ornynan óndirilgen shıki munaıdy Kaspıı qubyr konsortsıýmynyń qubyry arqyly eksporttaý úzdiksiz júrgizilip jatyr.
Eki kún buryn konsortsıýmnyń «Kropotkınskaıa» munaı aıdaý stansasy dron shabýylyna ushyrady.
«Transneft» kompanııasynyń baspasóz qyzmeti resmı málimdeme jasap, shabýyl saldary 1,5-2 aı ishinde joıylatynyn aıtty. Sondaı-aq bul Qazaqstannan aıdalatyn munaı kóleminiń shamamen 30%-ǵa qysqarýyna ákeletinin málimdedi.
Atyraý oblysyndaǵy «Teńiz» ken ornynan alynǵan munaı Kaspıı qubyr konsortsıýmy ıelik etetin «Teńiz-Novorossıısk» qubyrymen tasymaldanady. Máseleniń mán-jaıyn surap «Teńiz» kenishin ıgerip jatqan «Teńizshevroıl» kompanııasyna habarlastyq.
– Kompanııa saıasatyna sáıkes «Teńizshevroıl» (TShO) munaı tasymaldaýǵa qatysty naqty málimetterge túsinikteme bermeıdi. Shıki munaı óndirý jáne Kaspıı qubyr konsortsıýmynyń (KQK) qubyry arqyly eksporttaý úzdiksiz júrgizilip jatyr. Budan basqa, TShO óziniń aǵymdaǵy nemese bolashaqtaǵy óndiris deńgeıiniń naqty derekterine túsinikteme bermeıdi, - dep jaýap berdi kompanııanyń baspasóz qyzmeti.
Aıta ketsek, QR Energetıka mınıstrligi Kaspıı qubyr konsortsıýmy arqyly munaı aıdaýda shekteý joqtyǵyn málim etti.
Qazaqstannyń Syrtqy ister mınıstrligi Kaspıı qubyr konsortsıýmynyń munaı aıdaý stansasyna jasalǵan dron shabýylyna qatysty túsinik berdi.