«Munaı Servıs Aqtóbe» JShS jumyskerlerine 17,3 mln teńge jalaqysyn bermeı keledi

AQTÓBE. QazAqparat - Aqtóbe oblysynda eńbek qatynastary salasyndaǵy jaǵdaı turaqty. Alaıda munaı shyǵarý kásiporyndarynda, temirjol salasy jáne shaǵyn bızneste azdaǵan shıelenis oshaqtary bar. Bul týraly oblystyq ákimdikte ótken baspasóz konferentsııasynyń barysynda «Aqtóbe oblysy boıynsha eńbek ınspektsııasy basqarmasy» MM-niń basshysy Mırbolat Raıymqulov habarlady.

«2015 jyly bizge 2420 shaǵym kelip tústi, al 2016 jyldyń 1-shi toqsanynda 595 shaǵym keldi. Bul salystyrmaly kórsetkish, biraq jalpy alǵanda kelip túsken shaǵymdardyń sany kóp», - dep atap ótti M.Raıymqulov.

Shaǵymdarda keltirilgen kemshilikterdiń deni jalaqynyń keshiktirilýimen baılanysty.

Búginde ótkizilip otyrǵan jumystyń arqasynda 235,6 mln teńgeniń jalaqy bereshegi óteldi.

«Munaı Servıs Aqtóbe» JShS-y óz jumyskerlerine 17,3 mln teńge jalaqysyn bermeı keledi. Kásiporyn basshysynyń ústinen qylmystyq is qozǵaldy, sot oryndaýshylary tyıym salynǵan múlikterdi satý sharalaryn ótkizip jatyr.