Munaı sektoryndaǵy qıyndyqtar 2027 jyly da jalǵasýy múmkin — HVQ

ASTANA. KAZINFORM — Qazaqstannyń munaı sektoryndaǵy ósim qarqyny 2027 jyly tómen deńgeıde saqtalady. Bul týraly Halyqaralyq valıýta qorynyń (HVQ) Qazaqstandaǵy mıssııasynyń basshysy Amına Laresh Astanada ótken baspasóz májilisinde málim etti.

munaı
Foto: freepik.com

Onyń aıtýynsha, 2026 jyly munaı salasynda týyndaǵan kedergilerdiń saldary kelesi jyly da sezilmek.

— Biz bıyl munaı sektorynda týyndaǵan qıyndyqtardy eskerdik. Olardyń saldary 2027 jyly da seziledi. Sondyqtan kelesi jyly munaı sektory ekonomıkalyq ósimniń negizgi qozǵaýshy kúshi bola almaıdy dep boljap otyrmyz, — dedi Amına Laresh.

Spıker Kaspıı qubyr konsortsıýmyna (KQK) jasalýy múmkin jańa shabýyldardyń yqtımal saldaryna da toqtaldy. Onyń sózinshe, munaı tasymalyna áser etetin qıyndyqtar Úkimettiń munaıdan alatyn kirisin azaıtyp, bıýdjet tapshylyǵyna áser etýi múmkin. Degenmen HVQ mundaı táýekelderdi negizgi ekonomıkalyq boljamyna engizbegen.

HVQ boljamyna sáıkes, 2027 jyly Qazaqstan ekonomıkasy negizinen munaıdan tys salalardyń esebinen ósedi.

— 2026 jyly munaı sektorynda bolǵan úzilisterdiń saldary kelesi jyly da saqtalady. Sebebi osy jaǵdaılarǵa baılanysty munaı salasyndaǵy keıbir jumystar keıinge qaldyryldy. Sondyqtan 2027 jyly munaı sektoryndaǵy ósim óte tómen bolady dep boljap otyrmyz, — dedi Amına Laresh.

Eske salaıyq, buǵan deıin HVQ Qazaqstandaǵy salyq túsimderine baǵa bergen edi.