Munaı salasyn damytýǵa baılanysty ekonomıkadan bólek jańa ekonomıka qurý Qazaqstannyń ulttyq ıdeıasyna aınalýy kerek - Q. Kelimbetov
ALMATY. Qyrkúıektiń 29-y. QazAqparat /Ádilet Musahaev/ - Munaı salasyn damytýǵa baılanysty ekonomıkadan bólek jańa ekonomıka qurý Qazaqstannyń ulttyq ıdeıasyna aınalýy kerek.
Bul jaıynda búgin "Samuryq-Qazyna" Ulttyq ál-aýqat qory" AQ-nyń Basqarma tóraǵasy Qaırat Kelimbetov Almatydaǵy T. Rysqulov atyndaǵy QazEÝ-diń oqytýshy quramy jáne stýdentterimen kezdesý barysynda aıtty.
Q. Kelimbetov bul jaǵdaıda aldymen Qazaqstannyń básekege qabiletti múmkindikterin paıdalaný kerektigin aıtady. Ol - munaıhımııalyq ónerkásipter, metallýrgııalyq, atom jáne agrosharýashylyq salalary. "Biraq olardy bilikti kadrlar men adam resýrstarynsyz iske asyrý múmkin emes. Elimizdiń jetekshi joǵary oqý oryndary aldynda ekonomıkany ártaraptandyrýǵa qabiletti jańa basshylardy daıyndap shyǵarý mindeti tur", deıdi atalmysh qordyń tóraǵasy.
Jıyn barysynda elimizdegi tehnoparkterdi damytý tóńireginde qoıylǵan suraqtarǵa Q. Kelimbetov ol baǵdarlamanyń 2003 jyldan beri qolǵa alynǵandyǵyn atap ótti. Onyń aıtýynsha, Almaty mańyndaǵy «Alataý sıtı» aqparattyq tehnologııa parki elimizdegi eń iri ortalyq bolyp tabylady. "Alǵashynda Úkimet aldynda IT, telekommýnıkatsııalyq kompanııalardy parkke tartý tapsyrmasy tursa, qazirgi kúni biz joǵary bilikti mamandardy daıyndaýdy qolǵa aldyq", deıdi ol.
