Munaı saqtaý oryndaryn zańsyz paıdalanyp, qyrýar qarjy taýyp júrgender tutyldy
ASTANA. Qazannyń 28-i. QazAqparat /Aıdar Ospanalıev/ - Qaraǵandy oblysynda «Jıhan Oıl» jaýapkershiligi shekteýli seriktestiginiń dırektory E.Shvetsov munaıdy saqtaý oryndaryn zańsyz paıdalanǵany úshin qylmystyq jaýapqa tartyldy.
Ol osy áreketi arqyly 73 mıllıon teńge paıda tapqan. Bul týraly búgin jýrnalıstermen bolǵan brıfıngte Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti, dep habarlaıdy QazAqparat.
Resmı ókildiń sózine qaraǵanda, tap osyndaı qylmys jasaǵan Soltústik Qazaqstan oblysyndaǵy «MIAV» JShS dırektory M.Jezbaev 1 jylǵa bas bostandyǵynan aıyryldy. Onyń zańsyz áreketten tapqan paıdasy 89 mıllıon teńgeni quraǵan.
