«Munaı saqtandyrý kompanııasy» AQ senimdilik reıtınginiń «A» deńgeıine kóterildi - «Ekspert Qazaqstan RA»
ASTANA. 16 naýryz. QazAqparat - «Ekspert Qazaqstan RA» reıtıng agenttigi «Munaı saqtandyrý kompanııasy» AQ saqtandyrý kompanııasynyń senimdilik reıtıngin «A» deńgeıine, ıaǵnı «senimdiliktiń joǵary deńgeıine» belgiledi.
Bul týraly reıtıng agenttiginiń baspasóz qyzmetinen habarlandy.
Agenttiktiń baǵalaýynsha, «Munaı saqtandyrý kompanııasynyń» reıtıngine oń yqpal etken basty faktorlar - saqtandyrýdyń negizgi túrleri boıynsha shyǵynnyń tómengi kórsetkishi, saqtandyrý portfeliniń saralanǵan qurylymy bolyp otyr. Budan bólek, kompanııanyń aǵymdaǵy ótempazdyǵynyń koeffıtsenti de joǵary mánge ıe, iri tólemder jasaý tájirıbelerin de júzege asyryp keledi (múlikti saqtandyrý jónindegi tólemderiniń iri somasy 193,3 mln. teńgeni quraǵan), ınvestıtsııalyq protfeli de saralanǵan.
«Kompanııa keń aýqymdy jáne senimdi klıenttik bazaǵa ıe. 2011 jylǵy kelisimsharttardyń jańarý deńgeıi 73,8 paıyzdy qurady», - dep atap ótedi «Ekspert Qazaqstan RA» bas dırektorynyń orynbasary Arman Jahın.
Onyń aıtýynsha, kompanııanyń oń faktorlaryna ornyqty saqtandyrý portfelin, óńirlik naryqtardaǵy qyzmet tıimdiliginiń joǵarylyǵyn, qaıta saqtandyrý qorǵanysynyń birkelki saralanýy men ınvestıtsııalyq portfeliniń turaqtylyǵyn jatqyzýǵa bolady.
Al saqtandyrý kompanııasy senimdiliginiń reıtıngtik baǵalanýyn tejeýge áser etetin faktorlarǵa saqtandyrý tólemder-nettosynyń eń joǵary múmkindik mólsheri áser etip otyr (2010 jylǵy 1 qazandaǵy jaǵdaı boıynsha jeke qarajattarynyń 44,7 paıyzyna teń). Sonymen birge, tejegish faktorlarǵa is júrgizý shyǵystaryndaǵy úlestiń joǵarylyǵy (2010 jyly 61,7 paıyz, 2011 jyldyń 9 aıynda 54,8 paıyz), jeke qarajaty jetkiliktiliginiń tómengi deńgeıi (2010 jylǵa 49,5 paıyz), aktıvter rentabeldiligi men ınvestıtsııalanǵan kapıtal kórsetkishiniń joǵarylamaýy áser etip otyr.
Esterińizge sala keteıik, «Munaı saqtandyrý kompanııasy» AQ - ámbebap saqtandyrýshy. 2011 jyldyń 9 aıyndaǵy qorytyndy boıynsha, Qarjy naryǵyn qadaǵalaý komıtetiniń málimetinshe, kompanııa barlyq qazaqstandyq kompanııalar arasynda jınaqtalǵan jıyntyq saqtandyrý syıaqylarynyń mólsheri jaǵynan 5-oryndy ıelendi. Sonymen qatar, 2010 jyldyń 1 qazanyndaǵy jaǵdaı boıynsha, kompanııa aktıvteri 9,4 mlrd. teńgeni qurap otyr, onyń ishinde jeke kapıtal - 3,4 mlrd. teńge, jarǵylyq kapıtal - 1,5 mlrd. teńge, al byltyrǵy jyldyń 9 aıyndaǵy saqtandyrý salymdary - 7,3 mlrd. teńgeni quraǵan.
