Munaı ónimderiniń baǵasy óskende alynatyn aktsız úlesi azaıtylmaq
ASTANA. KAZINFORM — Munaı ónimderiniń kóterme baǵasy ósken kezde alynatyn qosymsha aktsız úlesi azaıtylmaq. Osyǵan qatysty Ulttyq ekonomıka mınıstrliginiń buıryq jobasy ashyq NQA portalynda jarııalandy.
«Benzınge (avıatsııalyq benzındi qospaǵanda), dızel otynyna, gazoholǵa, benzanolǵa, munaı eritkishine, jeńil kómirsýtekter qospasyna jáne ekologııalyq otynǵa arnalǵan aktsızder mólsherlemelerin bekitý týraly» Úkimet qaýlysyna engiziletin ózgerister munaı óndirýshi uıymdardyń ekonomıkalyq tıimdiligin arttyrý, sondaı-aq sala kásiporyndaryn damytý ári jańǵyrtý úshin ınvestıtsııalyq múmkindikterdi keńeıtý maqsatynda ázirlengen.
— Jobada munaı ónimderiniń kóterme baǵalary kóterilgen kezde qoldanylatyn qubylmaly qosymsha aktsız úlesin 95%-dan 50%-ǵa deıin tómendetý, ıaǵnı 2026 jylǵy 1 qyrkúıekke deıin qoldanysta bolǵan tártipti ornyna keltirý kózdeledi, — dep túsindiredi mınıstrlikten.
Aıta keteıik, buǵan deıin Úkimettiń 2026 jylǵy 27 tamyzdaǵy qaýlysymen benzınge (avıatsııalyq benzındi qospaǵanda), dızel otynyna, gazoholǵa, benzanolǵa, munaı eritkishine, jeńil kómirsýtekter qospasy men ekologııalyq otynǵa salynatyn aktsız mólsherlemelerine ózgerister engizildi.
