Munaı ónimderiniń aınalymyn tsıfrlyq baqylaý keńeıtiledi
ASTANA. KAZINFORM- Qazaqstanda munaı men munaı ónimderiniń uńǵymadan bastap avtojanarmaı quıý stantsııasyna deıingi qozǵalysyn biryńǵaı tsıfrlyq esepke alý júıesin qalyptastyrý jumystary júrgizilip jatyr.
Digital Qazaqstan strategııasy aıasynda energetıkalyq resýrstar qozǵalysyn tsıfrlyq baqylaýmen qamtý kórsetkishin 2026 jyly 20%-ǵa, 2027 jyly 60%-ǵa, al 2028 jyly 80%-ǵa jetkizý kózdelgen.
Osy mindetterdi iske asyrý aıasynda Energetıka mınıstrligi Quryltaı depýtaty Bekjan Álimqulovpen birlesip, janar-jaǵarmaı materıaldaryn ótkizý nysandaryna baryp, olardyń jumysymen tanysty.
Іs-sharaǵa Energetıka vıtse-mınıstri Baqytjan Іlııas, Qazaqstannyń otyn qaýymdastyǵynyń jáne «Aqparattyq-esepke alý ortalyǵy» AQ ókilderi qatysty.
Avtojanarmaı quıý stantsııasy men munaı bazasyna barý barysynda qatysýshylar munaı ónimderin ólsheý jáne esepke alýdyń qoldanystaǵy júıelerimen, sondaı-aq olardy qabyldaý, saqtaý jáne bosatý úderisterimen tanysty.
Esepke alý derekteriniń durystyǵyn qamtamasyz etý, olardy avtomatty túrde berý, aqparattyq júıelerdi ıntegratsııalaý jáne munaı ónimderiniń aınalymyn tsıfrlyq baqylaý tetikterin jetildirý máselelerine erekshe nazar aýdaryldy.
Budan bólek, «QazMunaıGaz» alańynda Qarjy mınıstrliginiń ókilderi men «Atameken» ulttyq kásipkerler palatasynyń tóraǵasy Qanat Sharlapaevtyń qatysýymen munaı ónimderiniń aınalymyn monıtorıngteý men taldaýǵa arnalǵan tsıfrlyq quraldardyń múmkindikteri kórsetildi.
Munaı men munaı ónimderiniń uńǵymadan bastap avtojanarmaı quıý stantsııasyna deıingi barlyq kezeńdegi qozǵalysyn biryńǵaı tsıfrlyq esepke alý júıesi arqyly baqylaý eseptik derekterdiń ózara sáıkestigin qamtamasyz etýge, alshaqtyqtardy ýaqtyly anyqtaýǵa, resýrstardyń joǵalýyn azaıtýǵa jáne olardyń aınalymynyń ashyqtyǵyn arttyrýǵa múmkindik beredi.
Energetıka mınıstrligi memlekettik basqarýdyń tıimdiligin arttyrý jáne otyn-energetıka kesheniniń ashyqtyǵyn qamtamasyz etý maqsatynda munaı ónimderin esepke alý men baqylaýdyń biryńǵaı tsıfrlyq júıesin qalyptastyrý, salalyq aqparattyq júıelerdi ıntegratsııalaý jáne zamanaýı analıtıkalyq quraldardy engizý boıynsha jumysty jalǵastyrady.
Qazaqstan munaı óndirisin arttyrý úshin Qytaı tájirıbesin paıdalanatyny týraly jazdyq.
