Munaı ónimderin syrtqa shyǵarýǵa salynǵan tyıym merzimi taǵy jarty jylǵa uzartyldy
ASTANA. KAZINFORM – Bıyl 21 mamyr men 21 qarasha aralyǵynda elimizden munaı ónimderiniń keı túrlerin eksporttaýǵa ýaqytsha ruqsat joq. Bul jóninde Qostanaı oblysy Kásipkerler palatasy málimdedi.
Atalǵan shekteý avtokólik jáne temirjol arqyly tasymalǵa qatysty. Al aldyńǵy tyıym 2025 jyldyń 21 qarashasynan bastap kúshine engen edi.
Vedomstvo málimetinshe, ónimderdi shetelderge, onyń ishinde Eýrazııalyq ekonomıkalyq odaq elderine shyǵarýǵa shekteý engiziledi.
Osylaısha, avtokólikpen benzın, dızel otyny jáne birqatar munaı ónimin (EAEO-nyń syrtqy ekonomıkalyq qyzmetiniń taýarlyq nomenklatýrasyndaǵy kodtary: 2709 00, 2710, 2902, 3403, 3811, 3826 00) shyǵarýǵa tyıym salynady. Degenmen, keı ónimderge munyń qatysy joq. Atap aıtqanda, birqatar kod boıynsha maılaý materıaldaryn, kólik quraldarynyń zaýyttan shyqqan janarmaı bóshkelerindegi otynyn, tıisti kelisim bolǵan jaǵdaıda ǵylymı zertteýlerge arnalǵan avıatsııalyq otyndy, sondaı-aq QR Úkimetiniń sheshimimen gýmanıtarlyq kómek aıasyndaǵy ónimderdi shyǵarýǵa ruqsat beriledi.
Sonymen qatar, shekara mańyndaǵy óńirler úshin arnaıy norma da qarastyrylǵan. Zaýyttan shyqqan janarmaı bóshkelerindegi otyn tıegen avtokólikter shekaradan táýligine bir ret qana óte alady.
Al temirjol arqyly EAEO-nyń syrtqy ekonomıkalyq qyzmetiniń taýarlyq nomenklatýrasyndaǵy 2710 12 kody boıynsha munaı ónimderin eksporttaýǵa tyıym salynady. Áıtse de, keı jaǵdaılarda ǵana jol beriledi. Bekitilgen jetkizý jospary boıynsha benzın eksporttaýǵa, sondaı-aq gýmanıtarlyq kómek nemese tótenshe jaǵdaılardyń saldaryn joıý úshin jiberiletin munaı ónimderin shyǵarýǵa ruqsat etiledi.
Aıta keteıik, buǵan deıin Koreıaǵa munaı eksportynyń naqty kólemi aıqyndalmaǵanyn jazǵanbyz.
Sonymen birge, bıyl 76 mln tonna munaı eksporttalady.
