Munaı ónimderi naryǵynyń ashyqtyǵy: kelesi jyldan bastap motor maılary tańbalandy
ASTANA. KAZINFORM — 2026 jyldan bastap Qazaqstanda motor maılarynyń tsıfrlyq tańbalanýy engiziledi. Bul týraly Energetıka mınıstrligi málim etti.
Astana Qazaqstan Respýblıkasy Energetıka mınıstrligi ýákiletti organdarmen birlesip, munaı ónimderi naryǵynyń ashyqtyǵyn arttyrý jáne tutynýshylardyń quqyqtaryn qorǵaý maqsatynda 2026 jyldyń basynan bastap motor maılaryn mindetti tsıfrlyq tańbalaý jáne qadaǵalaý júıesin engizýdi qolǵa almaqshy. Bul jańa mehanızm otyn-energetıka keshenin keshendi tsıfrlandyrýdyń bir bóligine aınalyp, jalǵan ónimdermen kúresýge baǵyttalady.
Sarapshylardyń baǵalaýynsha, elde satylatyn motor maılarynyń 50%-ǵa jýyǵy kóleńkeli aınalymda bolýy múmkin. Bul jaǵdaı ekonomıkaǵa zııan keltirip qana qoımaı, avtokólik ıeleri úshin tikeleı qaýip tóndiredi. Sapasyz ónimderdi paıdalaný qozǵaltqyshtyń isten shyǵýyna, qymbat jóndeýge jáne, tıisinshe, azamattardyń qarjylyq shyǵynǵa ushyraýyna alyp kelýi múmkin.
— Búginde naryqta ónimdi qorǵaýdyń túrli tásilderi qoldanylady — gologrammalar, kópqabatty qaqpaqtar, QR-kodtar. Alaıda, kóp jaǵdaıda olar ónimniń túpnusqalyǵyn kepildendire almaıdy. Jalǵan ónimderdi kózben ajyratý barǵan saıyn qıyndaı túsýde, sonymen qatar, bos qalǵan túpnusqa kanıstrlerdi qaıtadan kontrafaktilik ónimmen toltyratyn jaǵdaılary da jıi kezdesedi, — delingen vedomstvo habarlamasynda.
Data Matrix kodtary sáıkestendirý quraldary arqyly tsıfrlyq tańbalaý mundaı qaýipterdiń aldyn alýǵa múmkindik beredi. Árbir ónim biregeı kodpen belgilenedi, al sol kodtaǵy aqparat Biryńǵaı jáne qadaǵalaý operatorynyń júıesine engiziledi. Ónimniń zaýyttan sórege deıingi joly tolyǵymen qadaǵalanyp, ashyq bolady.
— Tsıfrlyq tańbalaýdy engizý — bul tek tutynýshyny qorǵaý ǵana emes, sonymen qatar munaı ónimderi naryǵynda adal, básekege qabiletti jáne qaýipsiz orta qalyptastyrýǵa baǵyttalǵan mańyzdy qadam. Tsıfrlandyrý — dástúrli baqylaý ádisterimen sheshe almaıtyn máselelerdi sheshý joly, — dep atap ótti QR Energetıka mınıstrliginde.
Data Matrix-kodty Naqty Onim mobıldi qosymshasy arqyly skanerleý arqyly tutynýshy ónimniń túpnusqalyǵyn tekserip, onyń sıpattamalary týraly málimet ala alady: quramy, tutqyrlyǵy, kólemi, sáıkestik deklaratsııasynyń bolýy. Bul sertıfıkattalǵan ónimge degen senimdi arttyryp, jalǵan ónimderdi satyp alý qaýpin azaıtady.
Tsıfrlyq tańbalaýǵa kóshý bıznes úshin de teń básekelestik jaǵdaılaryn jasaıdy: adal kompanııalar óz brendin qorǵaýǵa múmkindik alady, al memleket taýar aınalymynyń eleýli bóligin kóleńkeden shyǵaryp, salyq tártibin tıimdi kúsheıtý quralyn alady.
Tańbalaý jáne qadaǵalaý protsesteriniń barlyǵy EAEO elderiniń aqparattyq júıelerimen biriktiriletin bolady, bul búkil odaq aıasynda biryńǵaı tsıfrlyq kontýr men tolyqqandy baqylaýdy qamtamasyz etedi.
Energetıka mınıstrligi energetıka salasyndaǵy aýqymdy tsıfrlyq transformatsııa baǵdarlamasyn júzege asyrýdy jalǵastyrady. Tańbalaý, qadaǵalaý, elektrondy platformalar men ıntellektýaldy monıtorıng sekildi zamanaýı ІT-sheshimderdi engizý — OEK naryǵynda ashyqtyqtyń, sapanyń jáne senimniń jańa deńgeıin qamtamasyz etetin qadam.
Buǵan deıin habarlanǵandaı, Eýrazııalyq ekonomıkalyq odaqtyń (EAEO) biryńǵaı naryǵynda taýar aınalymynyń zańdylyǵyn qamtamasyz etý, tutynýshylardyń quqyqtaryn qorǵaý, kóleńkeli ekonomıkanyń úlesin azaıtý jáne bıznesti júrgizý úshin teń básekelestik jaǵdaılardy qalyptastyrý maqsatynda Odaqqa múshe memleketter taýarlardyń jekelegen túrlerin sáıkestendirý quraldarymen tańbalaý týraly sheshim qabyldady.