Munaı ónimderi, qubyrlar, astyq – Qazaqstan Reseıden qandaı taýarlardy jıi ımporttaıdy

ASTANA. KAZINORM – Saýda jáne ıntegratsııa mınıstrligi Qazaqstannyń Reseıden qandaı taýarlardy jıi ımporttaıtyndyǵyn málimdedi.

«2023 jyldyń qorytyndysyna Qazaqstannyń Reseıden ımporttaǵan negizgi taýarlary mynalar: munaı ónimderi – 572,5 mln dollar (úlesi 3,9 paıyz), qubyrlar men qara metaldan quıylǵan qubyrlar - 409,1 mln dollar (2,8 paıyz), qospasyz bolattan daıyndalǵan jartylaı fabrıkattar – 365,2 mln dollar (2,5 paıyz), astyq – 297,8 mln dollar (2 paıyz), qospasyz bolattan ystyqtaı ılektelgen shybyqtar – 233,6 mln dollar (1,6 paıyz), qara metaldan quıylǵan nemese dánekerlengen qubyrlar, tútiksheler men keskinder – 203,3 mln dollar (1,3 paıyz), nan jáne unnan jasalǵan kondıterlik ónimder – 195 mln dollar (1,3 paıyz)», - dep atap ótti mınıstrlikten agenttiktiń resmı saýalyna oraı.

Vedomstvo málimetinshe, Qazaqstan-Reseı shekarasynda avtomobılderdi ótkizýge arnalǵan 30 beket bar. Onyń 17-si – kópjaqty, 13-i ekijaqty. Olar: Qurmanǵazy, Jánibek, Tasqala, Syrym, Shaǵan, Aqsaı, Orda, Jaısan, Álimbet, Qarashataý, Qondyqbaı, Jelqýar, Aıat, Qaıraq, Obaǵan, Aqbalshyq, Jańa jol, Qyzyljar, Qaraqoǵa, Bıdaıyq, Amangeldi, Órlitóbe, Qosaq, naıza, Sharbaqty, Qoıanbaı, Baıtanat, Aýyl, Jezkent, Úbe.

«30 avtomobıl ótkizý beketiniń ishinde mynalarda júk jáne jolaýshylar aǵyny barynsha joǵary: Órlitóbe, Qosaq (Pavlodar oblysy), Qaıraq (Qostanaı oblysy), Jańa jol (SQO), Jaısan (Aqtóbe oblysy), Syrym (BQO), Qurmanǵazy (Atyraý oblysy), Aýyl (Abaı oblysy), Úbe (ShQO)», - dep naqtylaıdy mınıstrlikten.