Munaı ónimderiniń jekelegen túrleriniń aınalymyn retteý tetigi zań júzinde bekitiledi

Bul týraly búgin QR Parlamenti Májilisiniń jalpy otyrysynda «Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» zań jobasy boıynsha baıandama jasaǵan Munaı jáne gaz mınıstri Saýat Myńbaev málim etti.

«Elbasy respýblıkanyń munaı-gaz salasyna, onyń ishinde memleketti munaı ónimderimen qamtamsyz etý máselelerine erekshe kóńil bóletini belgili. Soǵan oraı, Prezıdent júktegen tapsyrmany oryndaý maqsatynda QR Úkimeti «Munaı ónimderiniń jekelegen túrlerin óndirý jáne onyń aınalymyn memlekettik retteý týraly» zań jobasyn ázirlegen bolatyn. Qoldanystaǵy zań 2003 jyly qabyldanyp edi. Odan beri biraz ýaqyt ótti, naryqtyq jaǵdaı da ózgerdi ári keıingi engizilgen birqatar túzetýlerge qaramastan onda kóptegen olqylyqtar bar bolyp shyqty», - dedi zań jobasy boıynsha baıandaǵan QR Munaı jáne gaz mınıstri Saýat Myńbaev. Onyń aıtýynsha, 2004 jyldan beri syrtqy naryqtyń áser etýinen jáne baǵany memlekettik retteýdiń tıimdi tetigi bolmaǵandyqtan munaı ónimderiniń baǵasy birden kóterilip ketýine sebep bolyp otyrǵan edi. «Biz qazirgi ýaqytta da ishki naryqta tutynatyn 13 mln. tonna munaıdyń 6,5 mln. tonnasyn Reseıden ımporttap otyrmyz. Sonymen qatar, joǵary oktandyq benzın men áýe kerosıniniń 20 paıyzynan astamyn da ımporttaımyz. Biraq, óńdeý qýattaryn ósirý qajettiligimen qatar, Úkimet aldyna qoıylǵan tapsyrmalardy júzege asyrý úshin munaı ónimderiniń naryǵyn retteýdiń basty tetigine ótýdi qarastyratyn jańa zań qajet degen tujyrymǵa kelgen edik», - deıdi mınıstr. Bul rette S. Myńbaev jańa zań jobasynda usynylǵan tetiktiń 2009 jyldan beri qoldanylyp kele jatqanyn atap ótti. Bul tájirıbe júzinde óziniń tıimdiligin kórsetti. «Atap aıtsaq, 2009 jyldan beri munaı ónimderiniń negizgi túrlerin respýblıka aımaqtaryna jetkizý birshama turaqtandy. Odan buryn aımaqtarda oryn alǵan baǵalardyń 30-40 paıyzdyq aıyrmashylyǵy joıyldy. Baǵalardyń dınamıkasy árıne, qubylmaly boldy. Degenmen, aıaq astynan ózgeretin sıpattamasy bolǵan emes. Alaıda, qazirgi tańda bul tetiktiń zańnamalyq qamtamsyzdyǵy bolmaı, tek kelisimsharttyq negizde jumys istep keledi. Sonymen qatar, bul tetiktiń zań jobasy arqyly joıylatyn kemshilikteri de barshylyq», - dedi S. Myńbaev.