Munaı ónimderine memlekettik baqylaýdy kúsheıtý máselelerine qatysty zań jobasy ekinshi oqylymǵa daıyn
ASTANA. Mamyrdyń 18-i. QazAqparat - Munaı ónimderine memlekettik baqylaýdy kúsheıtý máselelerine qatysty zań jobasy ekinshi oqylymǵa daıyn. Májilistiń Zańnama jáne sot-quqyqtyq reforma komıteti osyndaı qorytyndy shyǵardy.
Salystyrma kestege 16 túzetý engizilgen. Atalǵan zań jobasy erteń, mamyrdyń 19-y kúni, Májilistiń jalpy otyrysynda ekinshi oqylymda talqyǵa salynady, dep habarlaıdy QazAqparat.
«Qazaqstan Respýblıkasynyń keıbir zańnamalyq aktilerine munaı jáne munaı ónimderiniń aınalymy salasynda memlekettik baqylaýdy kúsheıtý máseleleri boıynsha ózgerister men tolyqtyrýlar engizý týraly» zańjobasy magıstraldyq munaı qubyrjoldaryna sanktsııasyz suǵyna qosylý jolymen júzege asyrylatyn munaı urlaýǵa qarsy kúres maqsatynda ázirlengen.Bul zań jobasyna Májilis depýtattary Valerıı Kotovıch, Erlan Nyǵmatýlın, Vladımır Nehoroshev jáne Bolat Qonarbaı bastamashy bolǵan.
Bastamashy depýtattardyń málimdeýinshe, munaı tasymaldaý kompanııalarynyń magıstraldyq munaı qubyrjoldarynyń kúzetin kúsheıtý sharalaryn qoldanǵanyna qaramastan, jaǵdaı nasharlaı túsýde. Qolda bar málimetterge qaraǵanda munaıdyń zańsyz aınalymy salasynda turaqty uıymdasqan qylmystyq toptar qalyptasqan. Olardyń ótkizý arnalary, suǵyna qosylýdy jáne ony búrkemeleýdi júzege asyratyn, munaıdy aǵyzý (quıý) jáne ony avtomobıl kóligimen tasymaldaý jónindegi mamandary bar. Osyǵan baılanysty zań jobasynda munaıdy zańsyz tasymaldaý, satyp alý, ótkizý, saqtaý, qaıta óńdeý úshin ákimshilik jáne qylmystyq jaýapkershilik belgileý, sondaı-aq munaı-gaz qubyrjoldarynan munaıdy urlaǵany, qylmystyq jolmen alynǵan munaıdy satyp alǵany jáne ótkizgeni úshin qylmystyq jaýapkershilikti qatandatý usynylǵan.
Zań jobasyn qabyldaý munaı ónimderin qaýipsiz tasymaldaýǵa jaǵdaı jasaýǵa jáne Qazaqstannyń munaı berýshi retindegi turaqty bedelin saqtaýǵa múmkindik beredi, sondaı-aq ol elimizdiń ekologııalyq salaýatyna yqpal etedi.
