Munaı ónimderin shetelge avtokólikpen shyǵarýǵa tyıym salyndy

NUR-SULTAN. QazAqparat – Energetıka vıtse-mınıstri Áset Maǵaýovtyń aıtýynsha, buıryq Energetıka, Qarjy, Іshki ister mınıstrlikteri jáne Ulttyq qaýipsizdik komıtetimen birlese bekitilip otyr, dep habarlaıdy QazAqparat tilshisi.

«Jalpy munaı ónimderi naryǵynda jaǵdaı turaqty. Janar-jaǵar maı stantsııalarynda tapshylyq baıqalmaıdy. 2019 jyldyń 3 jeltoqsanyndaǵy jaǵdaı boıynsha elimizdiń munaı bazalaryndaǵy janar-jaǵar maı qaldyqtarynyń sany ishki naryqtyń qajettiligin jabýǵa jetkilikti bolyp otyr. AI-92 benzıniniń qory – 182,3 myń tonna (16 kúnge), al dızel otynynyń qory – 210 myń tonna (17 kúnge). Qazirgi óndiris ishki tutyný suranysyn tolyǵymen jabady», - dedi Áset Maǵaýov Úkimettiń baspasóz ortalyǵynda ótken brıfıng barysynda.

Vıtse-mınıstrdiń aıtýynsha, qazaqstandyq óndiristiń joǵary oktandy benzınin eksporttaý úshin zańnamalyq baza tolyǵymen daıyndalǵan. Bıyl maýsym aıynan qarashaǵa deıin 106,1 myń tonna eksporttalǵan. Bolashaqta eldiń eldiń ishki naryqtaǵy suranysyn qamtamasyz etkennen keıin bos kólem bolǵan jaǵdaıda eksport kólemin ulǵaıtý josparlanyp otyr.

«Bul rette shekaralas oblystarda munaı ónimderiniń ruqsat etilmegen tasymalyn boldyrmaý úshin Energetıka, Qarjy, Іshki ister mınıstrlikteri Ulttyq qaýipsizdik komıtetimen birlesip, munaı ónimderin avtokólikpen shyǵarýǵa tyıym salý týraly buıryqty bekitti. 2019 jyldyń 3 jeltoqsanyndaǵy jaǵdaı boıynsha respýblıkada AI-92 benzıniniń ortasha bólshek saýda baǵasy – 148,1 teńge, dızel otynyna – 193,3 teńgeni quraıdy», - dedi ol.