Munaı ónimderin elden shyǵarylýyn shekteý jáne oǵan baqylaýdy kúsheıtý mańyzdy - Aqsholaqov

NUR-SULTAN. QazAqparat – QR Energetıka mınıstri Bolat Aqsholaqov elimizde janarmaı baǵasynyń turaqtylyǵyn qamtamasyz etý baǵytynda atqarylatyn jumystardy atady, dep habarlaıdy QazAqparat tilshisi.

«Janar-jaǵarmaı naryǵyndaǵy jaǵdaıdy odan ári turaqtandyrý maqsatynda tıisti sheshimder qabyldaýy kerek. Oblystardyń jáne respýblıkalyq mańyzy bar qalalardyń ákimdikteri Energetıka mınıstrligine, onyń ishinde jergilikti janarmaı quıý stantsııalary, kommýnaldyq kásiporyndar men avtobýs parkteri dızel otynynyń talap etiletin kólemine ótinimder boıynsha aqparat berýdi jedeldetsin. Tsıfrlyq damý, ınnovatsııalar jáne aeroǵarysh ónerkásibi mınıstrligi jáne Energetıka mınıstrligi táýliktik bosatý lımıtterin baqylaýdyń tsıfrlyq júıesin engizýdi jedeldetýi tıis. QazMunaıGaz Qazaqstanǵa 100 myń tonna ımporttyq dızel otynyn jetkizýdi jyldamdatýy tıis. Sondaı-aq Atyraý munaı óńdeý zaýyty jóndeýge toqtaǵan kezde qosymsha kólemde ımportty qarastyrsyn», - dedi B. Aqsholaqov.

Onyń aıtýynsha, QTJ vagon-tsısternalardyń ýaqtyly berilýin jáne tıelgen kólemderdiń basymdyqpen jetkizilýin úılestirý men baqylaýdy jalǵastyrýy kerek.

«Básekelestikti qorǵaý jáne damytý agenttigi munaı óńdeý zaýyttarynda jáne munaı bazalarynda dızel otynyna kóterme saýda baǵalaryn ýaqytsha memlekettik retteýdi qosymsha pysyqtaýy tıis. Qazir tıisti jumystar júrgizilip jatyr. Energetıka mınıstrligi, jergilikti atqarýshy organdar jáne QMG avtobenzın óndirýdi, qordyń ornyn toltyrýdy ári ótkizýdi baqylaýdy qamtamasyz etýi kerek. Jergilikti atqarýshy organdar quqyq qorǵaý organdarymen birlesip, munaı ónimderiniń Qazaqstan Respýblıkasynan tys jerlerge shyǵarylýyn shekteýi jáne aınalymyna baqylaýdy kúsheıtýi mańyzdy», - dedi vedomstvo basshysy.

Budan buryn habarlanǵandaı, munaı ónimderin óndirýdiń 2022 jylǵa arnalǵan boljamy 13,72 mln tonnany quraıdy, bul 2021 jylǵa qaraǵanda 1,04 mln tonnadan astam joǵary.