Munaı óndirý uńǵymalaryn onlaın baqylaıtyn otandyq júıe eksportqa shyǵarylmaq
ASTANA. KAZINFORM — Munaı óndirý uńǵymalaryn onlaın baqylaıtyn otandyq júıe eksportqa shyǵarmaq. Bul týraly Úkimet otyrysynda Energetıka mınıstri Erlan Aqkenjenov aıtty.
— Memleket basshysy jarııalaǵan Tsıfrlandyrý jáne jasandy ıntellekt jyly aıasynda mınıstrlik otyn-energetıka keshenine jasandy ıntellektini engizý boıynsha júıeli jumys júrgizýde. Osy maqsatta mınıstrlik jahandyq vendorlar, salalyq kompanııalar jáne jasandy ıntellekt sheshimderi bar IT-kompanııardyń qatysýymen AI — alıans qurdy. Sonymen qatar otandyq baǵdarlama óndirýshilerdi qoldaýǵa erekshe kóńil bólinýde. Osy baǵytta Astana Hub rezıdentterimen jasandy ıntellekt sheshimderin birlesip synaqtan ótkizý jáne engizý boıynsha memorandýmdar jasaldy, — dedi ol.
Mınıstrdiń dereginshe, búginde 45 jasandy ıntellekti jobasynan turatyn portfel qalyptastyryldy. Onyń ishinde 10 joba saraptama satysynda, 27 joba ázirlený ústinde, al 8 joba engizý kezeńine ótti.
— Birinshi mysal — munaı óndirý salasynda jasandy ıntellektini praktıkalyq qoldaný. Bul — uńǵymalardy onlaın baqylaýǵa arnalǵan ıntellektýaldy júıe. Júıeniń negizgi mindeti — uńǵymalardyń kórsetkishterin naqty ýaqytta taldaý. Jasandy ıntellekt aýytqýlardy anyqtap, óndirýdi boljaıdy. Pılottyq engizý birqatar jer qoınaýyn paıdalanýshy bazasynda iske asyryldy. Kútiletin nátıje– uńǵymalardyń toqtap qalý ýaqytyn 20 paıyzǵa deıin qysqartý jáne 1 mlrd teńge deıin ekonomıkalyq tıimdilikke qol jetkizý. Aıta ketý kerek, bul júıe — qazaqstandyq ónim. Onyń eksporttyq áleýeti bar. Qazirgi ýaqytta júıeni halyqaralyq naryqtarǵa, onyń ishinde AQSh naryǵyna shyǵarý boıynsha jumys júrgizilýde, — dedi Erlan Aqkenjenov.
Aıta keteıik, Úkimet otyrysynda ekonomıka salalaryna jasandy ıntellekt elementterin engizý jaıy talqylanyp jatyr.
