Munaı óndirý tómendese de ekonomıka 4,2 paıyz ósti - Jumanǵarın
ASTANA. KAZINFORM – Bıyl 9 aıdyń qorytyndysynda ekonomıkanyń ósýi 4,2 paıyzdy qurady. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Bıyl ekonomıka birqatar tejeýshi faktor jaǵdaıynda damyp keledi. Birinshiden, bul - munaı óndirisiniń azaıýy jáne munaı sektorynyń jalpy ishki ónimniń ósýine teris úlesi. 9 aıdyń qorytyndysy boıynsha munaı óndirý 8,3%-ǵa qysqaryp, 69,4 mln tonnany qurady. Ekinshiden, teńgeniń nyǵaıýy eksportqa baǵdarlanǵan salalar men bıýdjet kiristerine tejegish áser etip jatyr. Úshinshiden, tutynýshylyq kredıtteý ósýiniń baıaýlaýy tutynýshylyq suranysty tejedi, - dedi ol.
Vıtse-premer málimetinshe, jyldyq mánde tutynýshylyq kredıtterdiń ósýi 2025 jylǵy tamyzdaǵy 26,4%-dan bıylǵy tamyzda 10,4%-ǵa deıin tómendedi.
- Atalǵan faktorlarǵa qaramastan, Qazaqstan ekonomıkasy ósýin jalǵastyrýda jáne oń dınamıkany kórsetip otyr. Osy jyldyń toǵyz aıynyń qorytyndysy boıynsha ekonomıkanyń ósýi 4,2%-dy qurady. Ekonomıkanyń ósýi shıkizatqa qatysty emes sektor esebinen qamtamasyz etildi, ol baǵalaý boıynsha 5,4%-ǵa ósti. Salalar arasynda qurylys, óńdeý ónerkásibi, kólik qyzmetteri jáne saýda eń joǵary qarqyn kórsetip otyr. Osy salalardyń jalpy ishki ónimniń ósýine qosqan jıyntyq úlesi 75%-dan asady. Aýyl sharýashylyǵy men baılanys qyzmetterinde de oń dınamıka saqtaldy. Kórsetkishterdiń dınamıkasy ekonomıka qurylymynyń birtindep ózgerip jatqanyn kórsetedi. Ekonomıkany kezeń-kezeńimen ártaraptandyrýdyń nátıjesinde 2025 jyldyń qorytyndysy boıynsha jalpy ishki ónim qurylymyndaǵy munaı óndirý úlesi 7,8%-ǵa deıin qysqardy. Bıyl birinshi jartyjyldyqtyń qorytyndysy boıynsha óńdeý ónerkásibiniń úlesi 14,1%-ǵa deıin ulǵaıdy, al taý-ken óndirý ónerkásibiniń úlesi 12,4%-dy qurady, - dedi Serik Jumanǵarın.
Aıta keteıik, 13 qazanda álemdik munaı baǵasy tústi.
