Munaı óndirý kólemi ýaqytsha tómendedi – mınıstrlik
ASTANA. KAZINFORM - Kaspıı qubyr konsortsıýmynyń teńiz termınalynda Qara teńiz akvatorııasyndaǵy kemelerdiń, ekıpajdardyń jáne qorshaǵan ortanyń qaýipsizdigin qamtamasyz etý maqsatynda munaı tıeý operatsııalary ýaqytsha toqtatyldy. Bul týraly QR Energetıka mınıstrligi habarlady.
- Bul rette konsortsıýmnyń barlyq óndiristik jáne tehnıkalyq nysandary jaramdy jaǵdaıda, shtattyq rejımde jumys istep tur jáne jaǵdaı qalypqa kelgen boıda shıkizatty qaıta tıeýdi dereý bastaýǵa daıyn, - delingen habarlamada.
Sondaı-aq onda qubyr júıesine munaı qabyldaýǵa qoıylǵan shekteýlerge baılanysty jáne rezervýarlyq parkterdiń shamadan tys tolyp ketýine jol bermeý maqsatynda munaı óndirýshi kompanııalar táýliktik óndirý kólemderine josparly túrde túzetý engizgeni aıtylady.
Sonyń nátıjesinde munaı óndirý kólemi ýaqytsha tómendedi. Bul shara tehnologııalyq sıpatqa ıe jáne óndiristik protsesterdiń turaqtylyǵyn qamtamasyz etýge baǵyttalǵan.
- Qazaqstan Respýblıkasy Energetıka mınıstrligi QKK basshylyǵymen, iri júk jóneltýshilermen, keme ıelerimen jáne salalyq memlekettik organdarmen turaqty ózara is-qımyl júrgizip keledi. Qazirgi ýaqytta keme qatynasynyń qaýipsizdigin qamtamasyz etý jáne qazaqstandyq munaı eksportyn álemdik naryqtarǵa turaqty túrde múmkindiginshe tezirek qalpyna keltirýge qajetti jaǵdaılardy jasaý jóninde úzdiksiz konsýltatsııalar júrgizilip jatyr, - delingen mınıstrliktiń habarlamasynda.
Osyǵan deıin mınıstrlik KQK arqyly munaı turaqty eksporttalyp jatqany týraly habarlaǵan bolatyn.
