Munaı óndirý azaısa da, ekonomıkalyq ósimge qol jetkizdik – Premer-Mınıstr
ASTANA. KAZINFORM – Premer-mınıstr Oljas Bektenov úshinshi toqsannyń qorytyndysy boıynsha el ekonomıkasynyń ósý dınamıkasy oń nátıje kórsetkenin atap ótti. Buǵan ekonomıkany ártaraptandyrý sharalary yqpal etken.
«Jalpy ishki ónimniń naqty ósý deńgeıi 4% qurady. Oǵan negizinen aýyl sharýashylyǵy, óńdeý ónerkásibi, qurylys jáne saýda salalary yqpal etti. Atalǵan kezeńde munaı óndirý kólemi tómendep ketti. Bul óz kezeginde, jalpy ishki ónimniń ósý qarqynyna keri áserin tıgizdi. Degenmen, ekonomıkanyń ósýi munaıdan tys sektorlardyń esebinen qamtamasyz etilgenin aıta ketý kerek. Buǵan ekonomıkany ártaraptandyrý sharalary nátıjesinde qol jetkizildi», - dedi O. Bektenov búgingi Úkimet otyrysynda.
Barlyq negizgi makrokórsetkishter boıynsha Almaty, Qaraǵandy, Qyzylorda, Pavlodar, Túrkistan, Shyǵys Qazaqstan oblystarynda, Astana jáne Shymkent qalalarynda ósim tirkelip otyr. Eń tómen kórsetkishter – Atyraý, Mańǵystaý, Jambyl, Batys Qazaqstan jáne Aqmola oblystarynda.
«Ákimder men mınıstrler belsendi jumys júrgizse, keıbir salalar men óńirlerdegi ekonomıkalyq kórsetkishter budan áldeqaıda joǵary bolatyn edi. Artta qalǵan salalardy jedeldetý úshin qajetti sharalardy der kezinde qabyldap, kúndelikti monıtorıng júrgizý kerek. Ákimdikter óńdeý ónerkásibin qoldaýǵa, qurylys pen saýdany yntalandyrýǵa basa nazar aýdarýy qajet. Munda úlken rezervter bar», - dedi O. Bektenov.
Oǵan qosa, Premer-Mınıstr ınvestıtsııalyq jobalardy iske asyrý kezinde qarjylyq tártipti qatań qamtamasyz etýdi tapsyrdy. Barlyq memlekettik organdar ınvestıtsııalyq jobalardy ýaqtyly ári sapaly iske asyrýdy maqsat etýge tıis.
«Kórip otyrǵanymyzdaı, ınvestıtsııa tartý deńgeıi tómendep barady. 11 óńir negizgi kapıtalǵa salynǵan ınvestıtsııalar boıynsha josparly kórsetkishke qol jetkizgen joq. 11 salada ınvestıtsııa tartý kórsetkishi óte tómen. Olardyń ishinde týrızm, aqparat jáne baılanys, rezeńke jáne plastmassa buıymdary, hımııa ónerkásibi jáne azyq-túlik ónimderiniń óndirisi bar. Salalyq mınıstrlikter men ákimdikter ónimdi satý naryqtary men eksporttyq taýarlardy keńeıtý úshin kásipkerlerge turaqty túrde qoldaý kórsetýge tıis. Óndiristerdi Qazaqstanǵa kóshirý úshin sheteldik kásiporyndardy izdep taýyp, osynda ornalasqan óndiristerde lokalızatsııany arttyrýǵa járdemdesý kerek», - dedi Oljas Bektenov.
Buǵan deıin Ulttyq ekonomıka mınıstri Nurlan Baıbazarov jyl basynan beri el ekonomıkasynyń ósimi shıkizattyq emes sektordyń esebinen bolǵanyn aıtty.
Sondaı-aq, 9 aıda bıýdjetke 14,9 trln teńge kiris kirgen.
