Munaı óndirýshi kompanııalarǵa salyq salý ońtaılandyrylady
ASTANA. QazAqparat - Aǵymdaǵy jyldyń naýryz aıynyń sońyna deıin munaı óndirýshi kompanııalarǵa salyq salýdy ońtaılandyrý sharalary qabyldanady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Parlamenti Senatynyń depýtaty Mıhaıl Bortnık málim etti.
«Qazirgi ýaqytta Úkimettiń ekonomıkalyq blogymen birlesip, negizgi munaıóndirýshi kompanııalardyń qarjylyq jaı-kúılerine saraptama júrgizilýde. Naýryz aıynyń sońyna deıin munaı óndirý kólemin saqtaý jáne áleýmettik mindettemelerdi oryndaý úshin salyq salýdy ońtaılandyrý, aǵymdyq ınvestıtsııalyq shyǵystardy qysqartý sharalary qabyldanatyn bolady», - dedi senator.
M.Bortnıktiń aıtýynsha, 2015 jylǵy boljam boıynsha, 80,5 mln. tonna munaı óndirilip, onyń 14,3 mln. tonnasy óńdeledi. Al eksportqa 60 mln. tonna munaı shyǵarylady. «Qazaqstan Respýblıkasynyń táýelsizdik alǵaly bergi ýaqytta munaı jáne gaz kondensatyn óndirý kólemi úsh eseden astamǵa ósip, 1991 jylǵy 25 mln. tonnadan 2014 jyly 80,8 mln. tonnaǵa jetti», - dedi ol.
