Munaı óndirý boıynsha teńiz jobalaryna serpin beriledi - Bozymbaev

ASTANA. QazAqparat - QR Energetıka mınıstri Qanat Bozymbaev munaı óndirýge qatysty bıylǵy josparlardy jarııalady, dep habarlaıdy QazAqparat tilshisi.

Mınıstrdiń sózine qaraǵanda, aǵymdaǵy jyly teńizde munaı óndirý boıynsha birqatar jobalar qolǵa alynady. Sondyqtan osy saladaǵy jumystar kúsheıe túsedi.

«Biz Salyq kodeksine jańa normalardy engizdik. Sonyń arqasynda teńiz jobalaryn jańǵyrtýǵa múmkindik týdy. Máselen, «Eni» kompanııasynyń Isataı jáne Abaı jobalaryna kirýi bar. Ótken jyly qarasha aıynda «Lýkoıl» men «QazMunaıGaz» tıisti qujattarǵa qol qoıyp, Jeńis jobasyn qarjylandyrýǵa kelisti. Al Hazar men Qalamqas teńiz jobalaryn birlesip ıgerý boıynsha bıyl biz ınvestorlardan jospar men bıýdjettiń jobasyn kútip otyrmyz. Atalǵan qujattardy alǵannan keıin naqty josparymyzdy aıta alamyz. Bul degenmiz, bıyl elimizde teńiz jobalaryna serpin beriledi», - dedi Q.Bozymbaev qoǵamdyq keńestiń otyrysynda.

Onyń aıtýynsha, bıyl Qazaqstanda 89 mıllıon tonna munaıdy óndirý josparlanǵan. Ótken jyly atalǵan kórsetkish 90,3 mln tonna bolǵan. «Iá, munaı óndirý kólemi azaıyp otyr. Sebebi eski kenderde, ásirese, Qyzylorda oblysynda munaı óndirý tómendedi. Ol, shamamen, 1 mıllıon tonna. Degenmen, mınıstrlik munaı óndirý kórsetkishin tómendetpeýge tyrysady», - dep atap kórsetti Q.Bozymbaev.

Aıta keteıik, búgingi otyrysta mınıstr otandyq benzındi kórshi memleketterge eksportaýdy bastaıtynyn aıtty.