Munaı óndirý 107,4 mıllıon tonnaǵa deıin ulǵaıady - Áset Erǵalıev

NUR-SULTAN. QazAqparat – 2026 jyly munaı óndirý 107,4 mıllıon tonnaǵa deıin ulǵaıady. Bul týraly Úkimet otyrysynda 2022-2026 jyldarǵa arnalǵan áleýmettik-ekonomıkalyq damýy boljamynyń jobasyn tanystyrý kezinde Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

«2022 jyly munaı óndirý 87,9 mıllıon tonnany qurap, 2026 jyly 107,4 mıllıon tonnaǵa deıin ulǵaıady. 2022 jyly taýarlar eksporty 60,1 mıllıard AQSh dollary deńgeıinde boljanyp otyr jáne 2026 jylǵa qaraı 79,8 mıllıard AQSh dollaryna deıin ulǵaıady. Taýarlar ımporty 2022 jyly 40,8 mıllıard AQSh dollarynan 2026 jyly 43,4 mıllıard AQSh dollaryna deıin ulǵaıady», - dedi Á. Erǵalıev.

Onyń aıtýynsha, saýda balansynyń saldosy 19,3 mıllıard AQSh dollarynan 36,4 mıllıard AQSh dollaryna deıin ósedi.

Osy makroekonomıkalyq kórsetkishterdi eskere otyryp, bıýdjettik parametrlerdiń kelesi boljamy ázirlendi. Respýblıkalyq bıýdjettiń kiristeri 2022 jyly boljamdar boıynsha 9,2 trıllıon teńgeni, 2023 jyly - 9,7 trıllıon teńgeni, 2024 jyly - 10,4 trıllıon teńgeni quraıdy.

«Kepildendirilgen transfertti 2022 jyly - 2,4 trıllıon teńge, 2023 jyly - 2,2 trıllıon teńge jáne 2024 jyly - 2 trıllıon teńge mólsherinde aıqyndap, áleýmettik mindettemelerdi qarjylandyrýǵa baǵyttaý usynylyp otyr», - dedi mınıstr.