Munaı óndirisin tómendetý boıynsha kóshbasshy el ataldy

ASTANA. QazAqparat - OPEK-tiń Bas hatshysy Mýhammed Barkındo Saýd Arabııasyn munaı óndirisin tómendetý boıynsha kóshbasshy memleketterdiń biri dep sanaıdy, dep habarlaıdy QazAqparat.

«Saýd Arabııasyn qosa alǵanda, OPEK-tiń keıbir músheleri munaı óndirisin azaıtý boıynsha kóshbasshy elderdiń birine aınaldy», - dep keltirdi Barkındonyń sózin Bloomberg agenttigi.

30 qarasha kúni OPEK segiz jylda alǵash ret munaı óndirisin 2017 jyldyń 1 qańtarynan bastap 1,2 mln. barrelge deıin azaıtý sheshimin qabyldady. Kóptegen sholýshylardyń paıymynsha, eger barlyq taraptar ýaǵdalasqan kelisimdi buzbaıtyn bolsa, munaı baǵasy 2017 jyly taǵy kóterilýi múmkin, dep jazady «Vedomostı» gazeti.

Citigroup sholýshylarynyń baǵalaýy boıynsha, ekinshi jartyjyldyqta Brent markaly munaı baǵasy 60 dollar jáne odan da joǵary bolýy yqtımal. Naryqtaǵy munaı tapshylyǵy táýligine 0,6-0,7 mln. barrelge jetpek. Degenmen, 2017 jyldyń sońyna qaraı qara altynnyń baǵasy neǵurlym joǵary bolsa, 2018 jyldyń aıaǵynda ol soǵurlym tómendeıdi. Sebebi AQSh óndirýshileri óndiris qýatyn arttyratyn bolady.

Buǵan deıin Iraktyń (OPEK-te munaı óndirisi boıynsha Saýd Arabııasynan keıin ekinshi orynda turǵan el) Munaı ónerkásibi mınıstrliginiń basshysy Djabbara al-Laıbı 5 qańtar kúni el munaı óndirisin qysqarta bastaǵanyn málim etken bolatyn. Irak óndiris kólemin 210 myń barrelge deıin, ıaǵnı 4,5 paıyzǵa azaıtýǵa ýáde etti.

Óndiris kólemin azaıtý jóninde kartelge enbeıtin memleketter de málimdeýde. Máselen, Qazaqstan munaı óndirisiniń ortasha aılyq kólemin 1,68 mln. barrelge deıin shekteıdi.

«Tómendeý Qazaqstan úshin sımvoldyq desek te bolady. Qazaqstannyń qarashadaǵy táýliktik munaı óndirý kólemi 1,7 mln. tonnany quraǵandyǵyn eskerer bolsaq, 20 myń tonna - bul is júzinde sımvoldyq tómendeý. Qarashada bizdiń elimiz rekordtyq munaı óndirdi. Bul osy jyly Qarshyǵanaq pen Teńiz ken ornyndarynyń  kúrdeli jóndeýden ótýine, buǵan qosa, Qashaǵannyń qatarǵa qosylýyna baılanysty jaıt»,-  dedi mınıstr.  

«Qańtar aıynda munaı barreli 60 dollardan astatyn bolsa, bizdiń bıýdjetimizge de, Ulttyq qorymyzǵa da ájeptáýir salyq túsetin bolady. Óıtkeni, qazirgi tańda bıýdjette munaı baǵasy 35 dollar bolyp belgilengen», - dedi Bozymbaev.