Munaı óńdeıtin jańa zaýyttyń qurylysy tek 2020 jyldan keıin qolǵa alynýy múmkin - Munaı jáne gaz mınıstri
ASTANA. 11 mamyr. QazAqparat /Qanat Mámetqazyuly/ - Qazaqstanda munaı óńdeıtin jańa zaýyttyń qurylysy tek 2020 jyldan keıin qolǵa alynýy múmkin.
Bul týraly búgin QR Parlamenti Májilisiniń jalpy otyrysynda «Munaı ónimderiniń jekelegen túrlerin óndirýdi jáne olardyń aınalymyn memlekettik retteý týraly» zań jobasy boıynsha baıandama jasaǵan Munaı jáne gaz mınıstri Saýat Myńbaev málim etti.
Jobany talqylaý barysynda depýtat Zeınolla Alshymbaev ishki naryqtaǵy janarmaı baǵasyn turaqtandyrý maqsatynda shaǵyn zaýyttar salý máselesin kótergen bolatyn. Osyǵan oraı mınıstrliktiń kózqarasyn bilýdi de aıtyp edi. «Buǵan deıin jańa zaýyt salý týraly másele kóterilgenimen, olar toqtatylǵany belgili. Bálkim, shaǵyn zaýyttardy iske qosyp, sol arqyly ónim kólemine áser etsek, ónim kólemi janarmaı baǵasyna da jaqsy áser berer?», - deıdi depýtat. «Taǵy bir zaýyt salatyn másele bar, biraq ol zaýyt 2020 jyldan bastap salynýy kerek degen oıdamyz. Soǵan deıin qoldanystaǵy úsh zaýytty jańǵyrtyp, sonyń qýatyn paıdalana alsaq, sol jetkilikti. Al shaǵyn zaýyttarǵa kelsek, eger olar eýrostandarttardy saqtasa olardy da qoldaýǵa bolady. Jalpy, biz ishki naryqta eýro-2 standartyn qoldanyp kelemiz. Shaǵyn zaýyttardyń buny oryndaýǵa esh múmkindigi joq. Al eger jańa tehnologııalar paıda bolyp, standarttardy ıgere alatyn shaǵyn zaýyt salamyn deıtinder bolsa, biz ony qoldaımyz. Tipti jeńildikter kórsetip, yntalandyramyz», - deıdi Saýat Myńbaev.
