Munaı óńdeý zaýyty qorshaǵan ortaǵa zııan keltirgeni úshin 31 mln teńge aıyppul tóleıdi
ATYRAÝ. QazAqparat - Atyraý munaı óńdeý zaýytyna qorshaǵan ortaǵa zııan keltirgeni úshin 31 mln teńge aıyppul salyndy, dep habarlaıdy QazAqparat tilshisi.
«Naýryz aıynda «Atyraý MÓZ» JShS bıologııalyq tazartý qondyrǵylaryn ornatý boıynsha jóndeý-profılaktıkalyq jumystarǵa kirisken. Tekseris kezinde sarqyndy sýlardy aǵyzýdyń qorshaǵan ortaǵa shyǵarylatyn emıssııalar normatıvinen asyp ketkeni anyqtaldy. Kásiporyn QR Ákimshilik quqyq buzýshylyq týraly kodeksiniń eki baby boıynsha ákimshilik jaýapqa tartyldy. Olar: 331-bap («Atmosferaǵa shyǵaryndylardy tazalaýǵa jáne sarqyndy sýlardy aǵyzýǵa arnalǵan jabdyqty paıdalaný qaǵıdalaryn buzý, sondaı-aq ony paıdalanbaý») jáne 328-bap («Ekologııalyq ruqsatta belgilengen, qorshaǵan ortaǵa emıssııalar normatıvteriniń asyp ketýi ne ekologııalyq ruqsattyń bolmaýy»)», - dep málimdedi Atyraý oblystyq ekologııa departamenti.
Kásiporynǵa 31 mıllıon teńgeden astam aıyppul salyndy. Budan tys, ekologtar kásiporynnyń QR ekologııalyq zańnamasyn buzý arqyly qorshaǵan ortaǵa keltirgen zalalynyń kólemin eseptep jatyr.
Avtor: A. Sokolov
