Munaı óńdeý zaýyttary mınımaldy jumys rejımine kóshirildi

NUR-SULTAN. QazAqparat – Qazaqstandaǵy munaı óńdeý zaýyttary mınımaldy tehnologııalyq rejımge kóshirildi. Bul týraly QR Energetıka vıtse-mınıstri Áset Maǵaýov málim etti, dep habarlaıdy QazAqparat tilshisi.

«Biz munaı óńdeý zaýyttaryn mınımaldy tehnologııalyq rejımge kóshirdik. Bul sharalar janar-jaǵarmaı materıaldaryn saqtaý qoımalarynyń tolyp ketýin boldyrmaýǵa baǵyttalǵan. Osyndaı jaǵdaı Reseı boıynsha baıqalyp otyr. Karantın sharalarynyń birtindep jeńildetilýin eskere otyryp, munaı ónimderin paıdalaný boıynsha aldaǵy ýaqytta ońtaıly qarqyndy kóretin bolamyz», - dedi vıtse-mınıstr Ortalyq kommýnıkatsııalar qyzmetinde.

Sonymen qatar ol dızel otynyn ótkizýge qatysty jaǵdaıǵa toqtaldy.

«Qazirgi kezde dızel otyny boıynsha eshqandaı problemany kórip turǵanymyz joq. Kóktemgi egis jumystarynyń arqasynda júk kólikterine dızel otynynyń qajettigi tıisti deńgeıge kóterildi», - dedi Áset Maǵaýov.

Budan buryn vıtse-mınıstr elimizde benzınge suranys tómendegenin aıtqan bolatyn.

«Kóptegen elderde indetke qarsy sharalardy engizýge qatysty janar-jaǵarmaıdy paıdalaný kólemi tómendedi. 2020 jyldyń 4 aıynyń qorytyndysy boıynsha benzındi paıdalaný kólemi ótken jyldyń uqsas kezeńine qaraǵanda 91 paıyzdy qurady. Bıylǵy sáýir aıynda 222 myń tonna otyn jaǵyldy, bul kórsetkish aqpan aıyna qaraǵanda 30 paıyzǵa tómen (319,6 myń tonna)», - dedi vıtse-mınıstr.