Munaı óńdeý zaýyttary keńestik standarttardan arylady - QMG

ASTANA. QazAqparat - Qazaqstandyq munaı óńdeý zaýyttaryna kúrdeli jóndeý jumystary júrgizilgen kezde benzın tapshylyǵy bolmaıdy. Bul týraly «QazMunaıGaz» UK AQ-nyń munaıdy tasymaldaý, qaıta óńdeý jáne marketıng jónindegi vıtse-prezıdenti mindetin atqarýshy Danııar Tıesov aıtty, dep habarlaıdy QazAqparat tilshisi.

«Búginde biz munaı óńdeý zaýyttaryn munaıdy aıdaýdy joǵarlatý baǵdarlamasyna kóshirdik. Azııada, Soltústik Amerıkada jáne Eýropadaǵy zaýyttarda jyl saıyn kúrdeli jóndeý jumystary júrgizilmeıdi, olar 3-4 jylda bir ret jóndeýden ótedi. Qazir zaýyttarymyzdy úshjyldyq jóndeý kezeńderge aýystyryp jatyrmyz», - dedi Tıesov Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, buǵan eki sebebi bar.

«Birinshiden, zaýyttardyń tehnıkalyq jaı-kúıin taǵy da tekserip shyǵý qajet boldy, qajetti sharalardy júrgizdik. Odan bólek, eń bastysy - normatıvtik bazamen jumys istedik, sebebi qazirgi standarttar Keńes Odaǵynan beri júrgizilip keldi: jyl saıyn zaýytty toqtatyp, árbir apparatty tekserý kerek, kýálandyrý júrgizip, kóptegen mór soqtyrý kerek... Qazirgi ýaqytta bul jumystardy aıaqtadyq. 2018 jyldan bastap, kúrdeli jóndeý jumystary júrgizilgen kezde zaýyttardyń bireýi ǵana toqtaıtyndaı tsıklge kóshemiz», - dedi Tıesov.

Ulttyq kompanııa ókilderi habarlaǵandaı, 2018 jyly Shymkent munaı óńdeý zaýyty ǵana kúrdeli jóndeýge jabylyp, jumysyn ýaqytsha toqtatady.

«Bul jańǵyrtý jumystarymen de baılanysty, sebebi kelesi jyly jańa tehnologııalyq qondyrǵylar qurylysynyń úlken kólemin aıaqtaımyz jáne kúrdeli jóndeý kezinde eki qondyrǵyny iske qosamyz. Qalǵan eki zaýyt tek profılaktıkalyq jóndeý jumystary úshin toqtatylady, biraq bul bizdegi qalypty protsedýra, qys-jaz maýsymdaryna aýysý kezinde júrgiziledi. Sol sebepti, zaýyttardyń tehnıkalyq ázirligi turǵysynan benzın tapshylyǵy bolmaıdy», - dep atap ótti QMG ókili.