Munaı óńdeý zaýyttary egiske qajet dızeldiń bir lıtrin 176 teńgeden satady

NUR-SULTAN. QazAqparat – Aqpan-sáýir aılarynyń arasynda dıqandarǵa kóktemgi egis jumystary úshin 231 myń tonna dızel otyny jetkizilgen. Bul dıqandardan túsken ótinim kóleminiń 92 paıyzyna teń, dep habarlaıdy QazAqparat tilshisi.

Atalmysh derekti QR Energetıka vıtse-mınıstri Áset Maǵaýov Ortalyq kommýnıkatsııalar qyzmetinde ótken brıfıngide aıtty.

«Memleket basshysynyń tapsyrmasyn oryndaý, sondaı-aq kóktemgi egis jumystaryn ýaqtyly jáne qalypty júrgizý úshin aýyl sharýashylyǵy taýaryn óndirýshilerge 400 myń tonna dızel otyny bólindi. 2022 jyldyń aqpan-sáýir aılarynda naqty 231 myń tonna nemese 92% jetkizildi», - dedi mınıstrdiń orynbasary.

Onyń aıtýynsha, qajetti janarmaı ónimderin tıep-jóneltý jumystaryna táýlik saıyn baqylaý jáne monıtorıngteý júrip otyr.

«Kóktemgi egis jumystaryna arnalǵan dızel otynynyń baǵasy munaı óńdeý zaýyttarynda 1 tonnasy úshin 212 myń teńge (lıtrine 176 teńge). Óńirlerge deıin jetkizýdi jáne saqtaýdy eskere otyryp, aýyl sharýashylyǵy taýarlaryn óndirýshiler úshin boljamdy baǵa bólshek saýda baǵasynan ortasha alǵanda 15-30% tómen bolady. 2019 jylmen salystyrǵanda baǵa ósimi 8,4%-dy quraıdy nemese jyl saıynǵy ósimniń 3%-ynan aspaıdy», - dedi Áset Maǵaýov.

Buǵan deıin kóktemgi egis jumystaryn júrgizý úshin aýyl sharýashylyǵy taýaryn óndirýshilerine arzandatylǵan baǵamen 400 myń dızel otyny bólingeni aıtylǵan bolatyn.