Munaı zaýyttaryn jańǵyrtý ishki naryqta turaqtylyq ornatty – Maǵzum Myrzaǵalıev
ASTANA. KAZINFORM – «QazMunaıGaz» ulttyq kompanııasy» aktsıonerlik qoǵamynyń basqarma tóraǵasy Maǵzum Myrzaǵalıev Pavlodarǵa jasaǵan saparynda kásiporynǵa tıesili munaı óńdeý zaýyttarynyń 2023 jylǵy jumysyn qorytyndylap, 2024 jylǵa arnalǵan jospardy talqylaý maqsatynda otyrys ótkizdi.
Jıyn kezinde ulttyq kompanııanyń enshisine kiretin Pavlodar munaı-hımııa zaýytynyń, Atyraý munaı óńdeý zaýytynyń, «PetroQazaqstanOılProdakts» jáne «CaspiBitum» JShS bas dırektorlary ózderi basqaryp otyrǵan kásiporyndardyń byltyrǵy óndiristik-qarjylyq nátıjeleri týraly baıandady.
Atalǵan málimetter negizinde «QazMunaıGazǵa» tıesili munaı óńdeý zaýyttary 2023 jyly óndiristik jospardy tıimdi oryndaǵany atap ótildi.
Mysaly, óndiristegi ashyq tústi munaı ónimderiniń sapasy 72,2%-ǵa jetti. Bul óz kezeginde rekordtyq kórsetkish sanalady. Sondaı-aq munaı óńdeý tehnologııalarynyń tereńdigi 85,5%-dy qurady.
Kásiporyn zaýyttary benzın óndirisin de arttyryp otyr. AI 92 benzıniniń óndirisi 2022 jylmen salystyrǵanda 5%, AI 95/98 óndirisi 17%, suıytylǵan munaı gazynyń óndirisi 8%-ǵa ulǵaıǵan.
Zaýyttarda júrgizilgen júıeli jumystyń arqasynda elimizde ishki janar-jaǵarmaı naryǵynda kóp jyldan beri alǵash ret turaqtylyq ornaǵany baıqaldy.
«Jyl qorytyndysy boıynsha áleýmettik mańyzy bar munaı ónimderin shyǵarý kórsetkishteri asyra oryndaldy. Nátıjesinde «QazMunaıGaz» aýyl sharýashylyǵy taýar óndirýshilerin janar-jaǵarmaımen qamtamasyz etý jolyndaǵy mindettemelerin tolyq atqardy», - dep atap ótti Maǵzum Myrzaǵalıev.
Jıyndy qorytyndylaǵan kompanııa basshysy joǵaryda aıtylǵan kórsetkishterdi ári qaraı jetildirý úshin qandaı sharalar qabyldanýy kerektigin tizip shyqty.
Eń áýeli munaı óńdeıtin zaýyttardyń turaqty jáne apatsyz jumys isteýin qamtamasyz etý qajettigi aıtyldy. Mejeli óndiristik kórsetkishterge qol jetkizip, ınvestıtsııalyq jobalardy merziminde oryndaý, ishki naryqqa (aýyl sharýashylyǵy taýaryn óndirýshiler men janar-jaǵarmaı stantsııalaryna – red.) dızel otynyn satý máseleleri de kompanııa jumysynyń basym baǵyttary bolatyny aıtyldy.
