Munaı óńdeý salasynda bıyl Qazaqstannyń JІÓ-ge úlesin ulǵaıtýǵa jaqsy múmkindik bar —Jumanǵarın
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın bıyl munaı-gaz salasynyń áleýetine jáne Mańǵystaý oblysynyń ınvestıtsııalyq-ekonomıkalyq damýyna arnalǵan ekonomıkalyq ósýdi qamtamasyz etý jónindegi shtab otyrysyn ótkizdi.
2024 jyly JІÓ-niń 4,8%-ǵa naqty ósýi kezinde 2025 jylǵa target — 7% mólsherinde dep belgilenip otyr. Bul ekonomıkanyń naqty sektorynyń ınvestıtsııalyq jobalaryn ýaqtyly iske asyrý kezindegi óte joǵary, biraq qol jetkizýge bolatyn kórsetkish.
Energetıka vıtse-mınıstri Erlan Aqkenjenov aıtqandaı, qańtar aıynyń qorytyndysy boıynsha munaı óńdeý 1,53 mln tonnany qurady nemese ótken jylǵy qańtardaǵy kórsetkishpen salystyrǵanda — 104%. Bul kórsetkish 2025 jylǵy birinshi aıdaǵy jospardan 0,6%-ǵa alda.
Qazaqstannyń JІÓ qurylymyndaǵy jalpy munaı óńdeý úlesi 1%-dan az (2023 jyly — 0,8%, 2024 jyly 9 aıda — 0,6%). Sonymen qatar munaı óńdeý salasy — bul qosylǵan quny joǵary ónim óndirisi. 2025 jylǵy mamyrdyń sońynda «CaspiBitum» BK JShS keńeıtý jobasyn iske asyrý aıaqtalǵannan keıin onyń qaıta óńdeý qýaty 1 mln tonnadan 1,5 mln tonnaǵa deıin ulǵaıýy tıis. 2026 jyly Qazaqstanda qaıta óńdeý qýatynyń jıyntyq kólemi 18 mln tonnadan 18,5 mln tonnaǵa deıin ósedi.
Vıtse-premer iri qaıta óńdeý zaýyttary men shaǵyn MÓZ júktemesine qatysty ózekti máselelerdi tyńdady.
- Qandaı da bir eleýli syrtqy faktor bolmasa, munaı óńdeý salasynda bıyl Qazaqstannyń JІÓ-ge úlesin ulǵaıtýǵa jaqsy múmkindik bar, — dep atap ótti Serik Jumanǵarın.
Mańǵystaý oblysynyń targetteletin fızıkalyq ósý ındeksiniń quramdas bóligi jekeleı qarastyryldy. Osy jylǵa arnalǵan 7%-dyq ósý mindeti kezinde qańtardyń qorytyndysy boıynsha aýyl sharýashylyǵy men balyq sharýashylyǵynda (jospardaǵy 101%-dan 87,5%-ǵa) jáne saýdada (nysanaly 105,4%-dyń ornyna 102%) kórsetkishterdiń tómen oryndalýy baıqaldy. Vıtse-premer aldaǵy aılarda qoıylǵan jospardyń oryndalýyn qamtamasyz etýdi tapsyrdy. Elimizdiń JІÓ-degi saýdanyń aıtarlyqtaı úlesin eskere otyryp (2024 jyly 19%) shtabtyń jaqyn aradaǵy otyrystarynyń biri qoımasy bar saýda men kólik salasyna arnalady.
Sondaı-aq shtab otyrysynda óńirdiń bıýdjettik-ınvestıtsııalyq jobalaryna qarajattyń tómen ıgerilý sebepteri qaralyp, taldaý jasaldy. Vıtse-premer shuǵyl qarjylandyrýdy qajet etetin barlyq jobany olardyń ekonomıkanyń naqty sektoryna salymdy ulǵaıtýǵa áser etý prızmasy turǵysynan zerdeleýdi tapsyrdy.
Aıta ketelik byltyr elimiz 87,7 mln tonna munaı óndirgen edi.