Munaı óńdeý qýaty 40 mln tonnaǵa deıin artady
ASTANA. KAZINFORM — Qazaqstan munaı óńdeýdi damytýdy kúsheıtýde: qýattardy jylyna 40 mln tonnaǵa deıin jetkizý josparlanyp otyr.
Munaı-gaz salasy qyzmetkerleri kúni qarsańynda munaı-gaz salasynyń damýy men bolashaǵyna toqtalyp ótken jón. Qazaqstan munaı óńdeý salasyn damytýdy kezeń-kezeńimen kúsheıtip, munaı óńdeý kólemin ulǵaıtýǵa, munaı ónimderin óndirýdi keńeıtýge jáne qosylǵan quny joǵary ónimder shyǵarýdy damytýǵa baǵyt alyp otyr.
2024 jyly elimizde munaı óńdeý kólemi 18,3 mln tonnany qurap, josparly kórsetkishten 2,23%-ǵa asyp tústi, al munaı ónimderin óndirý kólemi 14,75 mln tonnaǵa jetti. 2025 jyly munaı óńdeý kólemi 18,4 mln tonnaǵa deıin ulǵaıyp, jospardan 4,5%-ǵa joǵary boldy. Munaı ónimderin óndirý 15,47 mln tonna, josparly kórsetkishten 6,3%-ǵa asty. 2026 jyly 15,49 mln tonna munaı ónimin óndirý josparlanyp otyr.
Salany odan ári damytý maqsatynda Úkimet 2025–2040 jyldarǵa arnalǵan munaı óńdeý salasyn damytý tujyrymdamasyn bekitti. Qujattyń negizgi mindeti – munaı óńdeý qýattaryn edáýir arttyrý jáne qoldanystaǵy munaı óńdeý zaýyttarynyń tıimdiligin joǵarylatý.
Tujyrymdama aıasynda jumys istep turǵan MÓZ-derdi keńeıtý kózdelgen. Nátıjesinde olardyń munaı óńdeý boıynsha jıyntyq qýaty jylyna 18 mln tonnadan 29 mln tonnaǵa deıin ulǵaıtylady. Budan bólek, qýaty jylyna 10 mln tonna bolatyn jańa iri munaı óńdeý zaýytyn salý josparlanyp otyr. Osylaısha, elimizdiń munaı óńdeý boıynsha jıyntyq qýatyn jylyna 40 mln tonnaǵa deıin jetkizý kózdelip otyr.
Sonymen qatar munaıdy óńdeý tereńdigin 89%-dan 94%-ǵa deıin arttyrý, motor otyndaryn óndirý kólemin ulǵaıtý jáne munaı-hımııa salasyn odan ári damytý josparlanýda. Sondaı-aq munaı ónimderiniń sapasyn ekologııalyq K4 standartynan K5+ standartyna deıin kezeń-kezeńimen arttyrý kózdelgen.
Atalǵan jobalardy iske asyrý Qazaqstanǵa munaı óńdeý kólemin edáýir arttyrýǵa ǵana emes, otandyq shıkizatty tıimdi paıdalanýǵa, munaı ónimderiniń assortımenti men óndiris kólemin keńeıtýge, jekelegen ónim túrleri boıynsha syrtqy jetkizilimderge táýeldilikti azaıtýǵa jáne munaı-hımııa salasyn odan ári damytýǵa jańa múmkindikter jasaýǵa múmkindik beredi.
Osylaısha, munaı óńdeýdi damytý Qazaqstannyń munaı-gaz salasyn transformatsııalaýdyń negizgi baǵyttarynyń biri. Bul rette basymdyq negizinen shıkizattyq modelden tolyq óndiristik tsıkl qalyptastyrýǵa jáne qosylǵan quny joǵary ónimder shyǵarýdy ulǵaıtýǵa aýysýǵa beriledi.
Aıta ketelik álemdik naryqta munaı baǵasy qymbattap keledi.
