Munaı óńdeý kólemi jylyna 39 mln tonnaǵa jetkiziledi
ASTANA. KAZINFORM — Munaı óńdeý kólemi jylyna 39 mln tonnaǵa jetkiziledi. Bul týraly búgin Energetıka mınıstri Erlan Aqkenjenov aıtty.
- Munaı-gaz salasyndaǵy negizgi oqıǵa retinde Teńiz ken ornyndaǵy Bolashaq keńeıtý jobasynyń tolyq aıaqtalýyn atap ótýge bolady. Úshinshi býyn zaýytynyń iske qosylýy jyl saıyn munaı óndirý kólemin 12 mln tonnaǵa arttyryp, ulttyq ekonomıka úshin eksporttyq valıýtalyq túsimniń turaqty jáne uzaqmerzimdi kózin qamtamasyz etedi. Іshki naryqty retteý maqsatynda biz batyl qadamdarǵa bardyq. Baǵany ákimshilik jolmen belgileýden bas tartylyp, Prezıdenttiń lıberalızatsııalaý jónindegi Jarlyǵyna sáıkes naryqtyq mehanızmderge kóshtik. Bul sharalar salany júıeli qalpyna keltirý úderisin bastaýǵa múmkindik berip, ishki naryqty otynmen turaqty qamtamasyz etýge jáne tapshylyq týyndaý qaýpin joıýǵa jol ashty, - dedi mınıstr BAQ ókilderine arnalǵan brıfıngide.
Onyń aıtýynsha, munaı óńdeý salasyn 2040 jylǵa deıin damytýdyń naqty óndiristik baǵdary bekitildi. Jumys qýattylyqty arttyrý, ónim sapasyn jaqsartý jáne ǵylymı negizdelgen tehnologııalardy engizý syndy negizgi úsh qaǵıdatqa súıenedi.
- Biz munaı óńdeý kólemin qazirgi 18 mıllıon tonnadan jylyna 39 mıllıon tonnaǵa deıin jetkizý mindetin aıqyndadyq. Osy maqsatta qoldanystaǵy úsh munaı óńdeý zaýytyn kezeń-kezeńimen keńeıtý kózdelgen. Bul baǵytta bıyl naqty nátıjege de qol jetkizdik. CaspiBitum zaýytyn jańǵyrtý jobasy tolyq aıaqtaldy. Nátıjesinde zaýyttyń óndiristik qýattylyǵy bir jarym esege arttyrylyp, jylyna 1,5 mln tonna munaı óńdeý deńgeıine jetti. Sonymen qatar, bıtým óndirý kólemi jylyna 500 myń tonnadan 750 myń tonnaǵa deıin ulǵaıtyldy. Bul jol qurylysy salasynyń sapaly bıtýmǵa degen ishki suranysyn tolyq qamtamasyz etýge múmkindik berdi, - dedi ol.
Mınıstrdiń dereginshe, Shymkent munaı óńdeý zaýytyn 6 mln tonnadan 12 mln tonnaǵa deıin, Atyraý munaı óńdeý zaýytyn 5,5 mln tonnadan 6,7 mln tonnaǵa deıin jáne Pavlodar munaı-hımııa zaýytyn 5,5 mln tonnadan 9 mln tonnaǵa deıin keńeıtý jumystary josparly jalǵasyp jatyr. Sonymen qatar jylyna 10 mln tonna munaı óńdeý qýatyna ıe jańa zaýyt salý jobasyna áleýetti ınvestorlardy tartý baǵytynda júıeli jumystar júrgizilip jatyr.
- Kómirtegi beıtaraptyǵyna qol jetkizý strategııasy aıasynda munaı ónimderiniń ekologııalyq talaptaryn kúsheıtý kózdelip, K5+ deńgeıindegi joǵary standarttarǵa kóshý bekitildi. Bul qalalaryndaǵy ekologııalyq ahýaldy jaqsartýǵa jáne halyq densaýlyǵyn qorǵaýǵa qosqan energetıka salasynyń naqty úlesi. Sonymen birge, óndiristi uıymdastyrý tásilderin túbegeıli ózgertýdemiz. Keshendi tehnıkalyq jańǵyrtý nátıjesinde munaıdy óńdeý tereńdigin 94 paıyzǵa deıin jetkizýge múmkindik beretin ozyq tehnologııalar engiziledi. Munaı óńdeý men munaı-hımııa salalaryn ózara yqpaldastyrý arqyly qosylǵan quny joǵary ónimder óndirý kózdelip otyr. Osylaısha munaı óndirý men óńdeý arasyndaǵy teńgerim sapaly jańa deńgeıge kóteriledi, - dedi Erlan Aqkenjenov.
Buǵan deıin mınıstr Kaspıı qubyr konsortsıýmyna shabýyl saldarynan kelgen shyǵyn eseptelinip jatqanyn aıtqan edi.